Новите царини што доцна синоќа ги најави американскиот претседател Доналд Трамп, не го одминаа ниту денешниот состанок на министрите за надворешни работи на земјите членки на НАТО во Брисел.
Иако, генералниот секретар на НАТО, Марк Руте во одговор на новинарско прашање при доаѓањето на состанокот одби да ги коментира, истакнувајќи дека „средбата не е за економски прашања и теми, сепак дел од европските министри изразија загриженост дека овие царини ќе предизвикаат натамошна ескалација на трансатлантските тензии и би можеле да го забават економскиот раст на Европа, што би се одразило и на напорите за зголемување на одбранбените трошоци и зајакнување на безбедноста.
Норвешкиот министер за надворешни работи Еспен Барт Еиде оцени дека одлуката на Трамп е во спротивност со Членот 2 од Основачкиот договор за НАТО, потенцирајќи дека „протекционизмот нема да помогне за изградбата на посилна одбрана“
Членот на кој алудираше Еиде вели дека членките на НАТО треба да настојуваат да ги „отсранат противречностите во нивните меѓународни економски политики и да промовираат економска соработка“.
Шефот на француската дипломатија Жан-Ноел Баро, пак, истакна дека е убеден оти „казнените царини“ на Трамп ќе имаат негативно економско влијание врз сите членки на НАТО.
Финската министерка за надворешни работи Елина Валтонен оцени дека единственото нешто што го постигнуваат трговските бариери и царините е намалување на куповната моќ на луѓето, изразувајќи надеж дека во претстојните разговори ќе се постигне решение кое ќе резултира со „помали трговски бариери меѓу пријателите и сојузниците“.
