Акциите на европските берзи претежно го завршија вчерашниот трговски ден во минус, откако банкарскиот сектор покажа слабост, а инвеститорите ги следат и политичките случувања во Франција.
Паневропскиот индекс STOXX 600 забележа пад од 0,4%, исто колку и британскиот FTSE 100, додека францускиот CAC 40 изгуби 0,2%. Единствен позитивен резултат дојде од германскиот DAX, кој се зголеми за ист процент.
HSBC во пад поради планови за приватизација
Акциите на британската банка HSBC, која котира на лондонската берза, паднаа за 5% по веста дека банката нуди приватизација на својата подружница Hang Seng Bank со седиште во Хонг Конг.
Ова негативно влијаеше врз целиот банкарски сектор, кој ја затвори сесијата со просечен пад од 1,4%.
Novo Nordisk со пад по објава за аквизиција
Акциите на данскиот фармацевтски гигант Novo Nordisk се намалија за 1,3% откако компанијата објави дека планира да ја купи американската биотехнолошка фирма Akero Therapeutics за 4,7 милијарди долари, или 54 долари по акција.
Политичка неизвесност во Франција
Инвеститорите со зголемено внимание ја следат и ситуацијата во Франција, каде што претседателот Емануел Макрон најави дека ќе именува нов премиер во рок од 48 часа, по оставката на Себастиен Лекорни во понеделникот.
