Европските берзани индекси денес (4 ноември) се во пад, а цената на златото опадна под 4.000 долари по унца, додека инвеститорите ја очекуваат објавата на кварталните резултати од компании како BP, Филипс и Ферари, пренесува CNBC.
Три официјални лица од американските Федерални резерви во понеделникот изразија сомнеж дека следниот месец ќе дојде до понатамошно ублажување на монетарната политика, што влијаеше и на цената на златото. Сега инвеститорите сметаат дека веројатноста за намалување на каматните стапки во САД во декември изнесува 65%, додека пред само една недела оваа бројка беше над 90%.
На европските пазари, индексот на франкфуртската берза DAX се намали за 1,5% на 23.760,83 поени, францускиот CAC 40 падна за 1,35% на 8.000,36 поени, а британскиот FTSE 100 за 0,76% на 9.627,40 поени.
Московската берза денес е затворена поради празникот Ден на народното единство, посветен на ослободувањето на Москва од полските и литванските освојувачи во 1612 година.
На американските пазари, пред отворањето на тргувањето, индексот Dow Jones падна за 0,48% на 47.336,68 поени, S&P 500 порасна за 0,17% на 6.851,97 поени, а Nasdaq се зголеми за 0,46% на 23.834,72 поени.
Европските фјучерси на гас за декември се тргуваа по 31,920 евра за мегават-час на отварањето на берзата TTF. Цената на суровата нафта падна на 60,478 долари, а Brent на 64,334 долари по барел.
Цената на златото е 3.995,22 долари за унца, додека цената на пченицата порасна на 5,4524 долари за бушел (27,216 кг).
Вредноста на еврото во однос на доларот на Forex пазарот изнесува 1,15240 долари, што е зголемување од 0,04% во однос на почетокот на тргувањето.
