Европските берзи денес ја отворија неделата со зелено светло, поттикнати од зголемените очекувања дека Федералните резерви на САД (ФЕД) би можеле да одлучат за намалување на каматните стапки на претстојниот состанок на 9 и 10 декември. Пазарните анализи, според CNBC, проценуваат дека веројатноста за намалување од 25 базични поени е порасната на 69,3%, откако неколку високи претставници на ФЕД испратија сигнали за можно олабавување на политиката.
Позитивните очекувања веднаш се одразија врз европските индекси. Франкфуртскиот DAX утринава порасна за 0,96%, достигнувајќи 23.308,52 поени. Францускиот CAC 40 забележа раст од 0,47%, додека британскиот FTSE 100 се искачи за 0,45%. Умерен раст се забележува и на московскиот MOEX кој порасна за 0,31%.
Сличен тренд се гледа и пред отворањето на американските берзи, каде вредностите на индексите се движат нагорно: Dow Jones за 1,08%, S&P 500 за 0,98%, а Nasdaq за 0,88%.
Во енергетскиот сектор, европските гасни фјучерси за декември на берзата TTF се отворија со цена од 29,985 евра за мегават-час, што укажува на стабилност по турбулентните недели предизвикани од геополитички фактори.
Цените на суровините бележат мешани движења. Суровата нафта падна на 57,751 долари, а нафтата Брент на 62,321 долари, додека златото порасна на 4.063,42 долари за унца, што традиционално укажува на засилен интерес за сигурни средства во време на пазарна неизвесност. Цената на пченицата се намали на 5,2455 долари по бушел.
На девизните пазари, еврото утринава бележи благ раст и се тргува по 1,15245 долари, што е 0,09% повисоко од почетокот на тргувањето.
Европските аналитичари порачуваат дека доколку ФЕД навистина направи пресврт кон намалување на каматите во декември, тоа би можело да донесе дополнителна стабилност и раст на европските финансиски пазари во последниот квартал од годината.
