Европските берзански индекси утрово бележат раст, додека вниманието на инвеститорите е насочено кон геополитичките тензии поврзани со Иран и најавените економски податоци од САД и Европа.
Податоците за јавните финансии на Обединетото Кралство покажуваат дека јавниот сектор во јануари остварил суфицит од 30,4 милијарди фунти, односно 40,8 милијарди долари. Тоа е двојно повеќе во споредба со истиот месец минатата година.
Во текот на денот се очекува објавување на економски показатели од Велика Британија, Германија, Франција и еврозоната, вклучително и податоци за малопродажбата, цените на производителите и таканаречените „flash“ PMI извештаи.
Во САД се очекува објавување на индексот на лична потрошувачка (PCE), кој е клучен показател за инфлацијата што го следи Федералните резерви, како и извештајот за бруто-домашниот производ за четвртиот квартал од 2025 година.
Индексот DAX во Франкфурт утрово порасна за 0,03 отсто на 25.027,45 поени, францускиот CAC 40 за 0,31 отсто на 8.422,45 поени, британскиот FTSE 100 за 0,23 отсто на 10.649,17 поени, а московскиот MOEX за 0,32 отсто на 2.781,85 поени.
Азиско-пацифичките пазари претежно бележеа пад, откако трите главни индекси на Волстрит завршија во минус. Dow Jones се намали за 0,54 отсто на 49.395,16 поени, S&P 500 за 0,28 отсто на 6.861,89 поени, а Nasdaq за 0,31 отсто на 22.682,73 поени.
Европските фјучерси за гас за март на берзата TTF се тргуваа по цена од 33 евра за мегават-час.
Цената на суровата нафта изнесува 66,316 долари, додека нафтата Брент се тргува по 71,656 долари. Златото порасна на 5.012,28 долари за тројска унца, а пченицата на 5,6066 долари за бушел.
Еврото на девизниот пазар Форекс се тргува по курс од 1,17503 долари, што е раст од 0,19 отсто во однос на почетокот на тргувањето.
Пазарите ќе реагираат на новите податоци за инфлацијата и економскиот раст во САД и Европа, како и на развојот на геополитичките настани на Блискиот Исток.
