Само неколку часа подоцна, парламентот на Холандија, каде најголема партија е крајнодесничарската Партија за слобода (PVV) на Герт Вилдерс, усвои резолуција со која го повика владата да ја прогласи Антифа за терористичка организација.
И унгарскиот премиер Виктор Орбан, кој често е инспирација за Трамп, најави дека и Унгарија ќе преземе сличен чекор. Наскоро потоа, европратеникот Том Вандендрише од белгиската националистичка партија Vlaams Belang поднесе предлог-резолуција во Европскиот парламент со истата цел. Тој изјави дека 79 европратеници од 20 земји ја поддржале иницијативата, опишувајќи ја Антифа како „меѓународна мрежа финансирана и заштитена од системот за насилно спротивставување на националистичката опозиција“.
Експертите: Антифа не е организација, туку движење
Сепак, според експертите, ваквите обвинувања немаат реална основа. Џесика Вајт, в.д. директорка за студии по тероризам и конфликти при Royal United Services Institute, за The Guardian изјави дека Антифа не е организација со структура и лидерство, туку лабаво движење без централизирано раководство.
„Поради недостатокот на јасна дефиниција, тешко е, па дури и контрапродуктивно, да се обиде да се прогласи за терористичка група“, рече таа, додавајќи дека безбедносните служби имаат малку корист од таква класификација, бидејќи полесно е да се осудат конкретни насилни дејствија отколку идеолошки идентитет.
Таа предупреди и на опасноста од политичка злоупотреба: „Постои оправдан страв дека оваа ознака би можела да се користи како политичко оружје против оние што се сметаат за противници на десничарските влади.“
Унгарија предводник во антиантифа реториката
Унгарската влада одамна ја нарекува Антифа „левичарска терористичка организација“. Во најновиот извештај на Европол сепак, не се спомнува терминот „Антифа“, иако се наведуваат 21 напад од левичарски или анархистички екстремизам во 2024 година — главно во Италија и Грција и насочени кон имот, а не кон луѓе.
Портпаролот на унгарската влада, Золтан Ковач, изјави дека припадници на Антифа „брутално тепале луѓе на улица“, а некои избегале од правдата. Меѓу нив ја спомена и Иларија Салис, италијанска активистка која во 2024 беше избрана за европратеник, со што по 16 месеци притвор во Унгарија доби имунитет. Таа беше обвинета за напад врз лица со крајнодесничарски симпатии.
Минатата недела, унгарската влада едвај не успеа да ѝ го одземе имунитетот, бидејќи Европскиот парламент гласаше против со само еден глас разлика. Салис изјави дека е невина и дека во Унгарија не може да очекува правично судење.
„Терминот ‘Антифа’ во Унгарија се користи за стигматизација на секој што не се согласува со режимот,“ рече Салис. „Ако да си антифашист значи да се спротивставиш на неговиот режим — тогаш, секако, јас сум антифашист.“
„Напад врз демократијата“
Мартин Ширдеван, копретседател на левичарската група во Европскиот парламент, изјави дека обидот за криминализација на антифашистичко движење „ја свири истата мелодија како крајната десница“ и претставува „ограничување на слободата на мислење и напад врз самата демократија“.
Трамп како инспирација за европската крајна десница
Според Павел Жерка од Европскиот совет за надворешни односи, Трамп претставува идеолошка инспирација и модел за новата европска десница, која ја презема неговата „културна војна“ и во сопствените земји.
Во неговиот извештај се наведува дека Трамп и движењето МАГА активно градат „Мага интернационале“ — мрежа на политичари, медиуми, донатори и тинк-тенкови што ги поврзува европските десничари со американските идеолошки сојузници.
Жерка предупредува дека и идејата за Антифа како „непријател“ е увезен американски концепт, дизајниран да создаде поделби во европските општества:
„Самото тврдење дека постои опасен политички противник создава моќна алатка за мобилизација и внатрешна кохезија на десницата,“ вели тој.
Извор: The Guardian
