Поплавите во 2024 година одзеле најмалку 335 животи и погодиле повеќе од 410.000 луѓе. Најмногу страдаше Западна Европа, а 2024 година е рангирана меѓу десетте највлажни години од 1950 година досега.
Штетите од невремето и поплавите се проценуваат на повеќе од 18 милијарди евра, што ги прави најскапи климатски катастрофи во Европа. Во глобални рамки, 2024 беше најтоплата година некогаш измерена, а Европа останува континентот што се загрева најбрзо.
„Секое ново зголемување на температурите го зголемува ризикот за нашите животи, економии и за планетата“, изјави генералната секретарка на WMO, Селесте Сауло.
Во извештајот се нагласува дека има и позитивни трендови – обновливите извори на енергија во Европа минатата година обезбедиле рекордни 45% од вкупното производство на електрична енергија, а поголемиот дел од европските градови веќе имаат стратегии за климатска адаптација.
Сепак, екстремните временски услови беа забележани низ целиот континент. Југоисточна Европа имала најдолг забележан топлотен бран – 13 дена, додека глечерите во Скандинавија се топеле со рекордна брзина. Источна Европа страдала од суши, а Западна од разорни поплави.
Околу третина од речната мрежа на Европа во 2024 година го надминала прагот на „високи поплави“, а 12% од мрежата била погодена од „тешки поплави“. Најмногу жртви и материјални штети биле предизвикани од поплавите во Валенсија во октомври, кога загинаа 232 лица. Истата година, бурата Борис донесе рекордни врнежи во централна Европа, со најпогодени Австрија, Чешка, Германија и Словачка.
Научниците предупредуваат дека климатските промени ја зголемуваат веројатноста за вакви врнежи, бидејќи потоплата атмосфера задржува повеќе водена пареа, што резултира со интензивен дожд. Во 2024 година е измерена рекордна концентрација на водена пареа во атмосферата.
Покрај климатските фактори, на поплавите влијаат и начинот на управување со реките, како и урбанистичкото планирање, кое често дозволува изградба на куќи и инфраструктура во ризични зони.
