Европа ќе остане светски лидер по употреба на тутун до 2030 година, предупредува Светската здравствена организацја (СЗО) во најновиот извештај за европскиот регион. И покрај постепеното намалување на традиционалното пушење, порастот на електронските цигари и новите никотински производи ја одржува зависноста – особено кај младите.
Според податоците, во 2024 година околу 173 милиони луѓе во европскиот регион на СЗО кој опфаќа 53 земји од Европа и Централна Азија користеле тутунски производи. Тутунот предизвикува повеќе од 1,1 милион смртни случаи годишно од незаразни болести. Доколку не се преземат поагресивни мерки, Европа ќе остане најлошо рангираниот регион во светот според контролата на тутунот.
Вејпингот ја освојува новата генерација
Најзагрижувачки е порастот на употребата на електронски цигари кај адолесцентите. Околу четири милиони млади на возраст од 13 до 15 години во регионот користат тутунски производи, а стапката на употреба на електронски цигари изнесува 14,3 проценти речиси подеднакво кај момчињата и девојчињата.
Кај возрасните, Европа има втора највисока стапка на користење електронски цигари во светот, веднаш зад Америка, со околу 31,4 милиони корисници. СЗО предупредува дека ароматизираните производи и агресивниот маркетинг на социјалните мрежи се насочени кон младите.
„Ова не е случајност, туку резултат на намерна стратегија на индустријата“, изјави регионалниот директор на СЗО за Европа, Ханс Клуге, повикувајќи на построга регулација и забрана на вкусови.
Жените во Европа – највисока стапка на пушење во светот
Европа е единствениот регион во светот кој нема да ја постигне целта за намалување на пушењето кај жените за 30 проценти до 2025 година. Намалувањето од 2010 година досега изнесува само 12 проценти.
Повеќе од 40 проценти од сите жени пушачи во светот – околу 62 милиони – живеат токму во Европа. Преваленцата кај жените изнесува 17,2 проценти, што е речиси двојно повеќе од следниот регион со највисока стапка.
Трендот е сличен и кај електронските цигари: во речиси половина од земјите со достапни податоци, девојчињата имаат повисока стапка на користење од момчињата.
Дали Европа реагира доволно?
Само 18 од 53 земји во европскиот регион имаат целосна забрана за пушење во сите јавни простори. Дел од државите како FФранција, Финска, Италија и Шведска воведоа ограничени забрани – на плажи, во училишта и паркови.
Во рамки на Европската Унија, преговорите за ревизија на Директивата за оданочување на тутунот продолжуваат. Првичниот предлог на European Commission за зголемување на акцизите, вклучително и за електронските цигари, се соочува со отпор од некои земји членки и можни одложувања.
СЗО апелира сите европски држави да воведат построги мерки за заштита на младите генерации и да ја спречат индустриската интервенција во здравствените политики, со цел да се избегнат долгорочни последици врз јавното здравје.
