Европските лидери разгледуваат формирање на тампон-зона широка 40 километри меѓу руските и украинските фронтови како дел од мировен договор.
Според Politico, оваа идеја се појавила во последен момент, а Москва наводно ја прифатила. Но, нејзината реализација би ги надминала капацитетите на Европа во однос на мировни сили, кои се веќе ограничени.
Очајничка потрага по мир
Според пет европски дипломати, ова е само еден од неколкуте предлози што ги разгледуваат воени и цивилни претставници за сценариото по војната. Не постои согласност за длабочината на зоната, а не е јасно дали Киев би го прифатил планот, со оглед на тоа што би вклучувал територијални отстапки.
САД не се вклучени во овие разговори. Самото тоа што НАТО-сојузниците размислуваат за блокирање дел од територијата на Украина во име на „кревок мир“ ја покажува нивната очајна потрага по решение за војната што влегува во четвртата година.
„Русите не се плашат од Европејците“
Претседателот Владимир Путин не покажува желба за запирање на борбите. Само вчера, Русија изведе масовен напад врз центарот на Киев, при што загинаа најмалку 23 лица, а беа оштетени канцелариите на Европската Унија и British Council.
„Се фаќаат за сламки“, изјави Џим Таунсенд, поранешен функционер на Пентагон задолжен за Европа и НАТО во времето на администрацијата на Обама. „Русите не се плашат од Европејците. Ако мислат дека неколку британски и француски набљудувачи ќе ги запрат во нивниот поход врз Украина, грешат.“
Историски паралели и ставот на Москва
Дипломатите избегнуваат споредби со демилитаризираната зона меѓу Северна и Јужна Кореја, иако повеќе ги потсетува на поделбата на Германија за време на Студената војна.
Путин и негови соработници тврдат дека работат на создавање на тампон-зони долж границата со Украина за да се создаде оддалеченост од украинската артилерија и дронови. Деталите, сепак, не се објавени.
Кој ќе го чува мирот?
Потребниот број војници е голема загатка – проценките варираат од 4.000 до дури 60.000. Земјите членки досега не презеле никакви обврски. Претседателот Трамп се дистанцира од идејата за учество на американски трупи.
НАТО веќе се бори да мобилизира 300.000 војници за своето источно крило. Мировните сили би имале двојна задача – да ја патролираат демилитаризираната зона и да ги обучуваат украинските трупи.
„Сите брзаат пред Трамп да се премисли“
Сојузниците се воздржани во давање јавни обврски, додека не се прецизираат правилата за ангажман и потенцијалната ескалација со Русија.
„Сите се обидуваат да се движат што побрзо за да не се предомисли Трамп“, изјави еден европски дипломат, алудирајќи на притисокот за договор пред американската администрација да се повлече.
Француска и британска улога, стравувања од источна Европа
Француските и британските сили би можеле да бидат јадрото на мировната мисија, што предизвикува загриженост кај земјите блиску до Русија, како Полска. Полска стравува дека ќе остане ранлива доколку пренасочи сили. Некои земји се плашат дека ваквата зона само ќе ги изложи украинските градови на поголем ризик.
„Не е разумно да се постапува така со противник што не преговара во добра волја“, рекол друг дипломат.
Додека Полска и Германија изјавиле дека не се заинтересирани да испратат трупи, Естонија ветила одреден број војници. Се очекува Украина да продолжи да обезбедува најголем дел од силите околу потенцијалната линија на примирје.
Минимална улога на САД
НАТО земјите разговараат со американски претставници за сателитска и воздушна поддршка, но не очекуваат многу повеќе. Пентагон веќе информирал дека САД ќе имаат минимална улога во какви било безбедносни гаранции за Украина.
САД е можеби единствената земја во НАТО со доволно сателити за обезбедување објективни податоци за евентуални прекршувања од страна на Русија.
„Сите чекаат да видат до каде се подготвени да одат американските власти и во меѓувреме им дозволуваат на Европејците да ги откријат своите карти“, изјави еден европски дипломат. „Станува збор за своевиден дипломатски танц.“
