Вучиќ: „Западот ќе мора да ја види вистината“
Додека најавува дека со ситуацијата во Србија ќе ги запознае лидерите на Истокот, претседателот на Србија, Александар Вучиќ, изрази уверување дека повлекувањето на активистите од просториите на Српската напредна странка (СНС) е силна порака до Западот – дека зад уличното насилство не стои власта, туку демонстрантите против неа.
Европските медиуми веќе известуваат, а европските институции постепено сфаќаат што навистина се случува во Србија. Според нив, реакцијата на ЕУ може да стане уште поостра.
Промената на тактиката, според Вучиќ, била препуштена на претседателот на владејачката партија и негов советник Милош Вучевиќ, кој донел одлука активистите на СНС да се повлечат од просториите во Нови Сад.
„Сега Европската унија нема да може лицемерно да се однесува и да обвинува некој друг, затоа што мислам дека тоа беше извонредно паметна одлука на претседателот Вучевиќ“, изјави Вучиќ.
Но, поранешниот дипломат и член на партијата Србија Центар, Душко Лопандиќ, тврди спротивното:
„Тоа е чиста пропаганда. За насилството на улиците е одговорна власта. Кога проценија дека можат, тие го започнаа насилството.“
Европските функционери го оценуваат насилството како „загрижувачко“. Европската комесарка за проширување порача дека напредокот на Србија кон ЕУ зависи од тоа граѓаните слободно да ги изразуваат своите ставови, а новинарите да известуваат без заплашување.
Лопандиќ предвидува дека оваа ескалација ќе доведе до посилна реакција на Западот, бидејќи Вучиќ веќе бил предупреден дека насилство не смее да се толерира:
„Вестите што се шират се доста објективни и мислам дека ова ќе го чини српскиот врв.“
Европските медиуми објавија фотографии од насилството
Најголемите светски агенции и медиуми, меѓу кои Фајненшл тајмс, Дојче веле, Ројтерс и Гардијан, објавија фотографии од протестите, опишувајќи ги како ескалација на деветмесечните демонстрации и реакција на нападот на активисти на СНС врз граѓани во Врбас.
Гардијан го нарекува Вучиќ „популист кој со месеци е соочен со протести, но тврдоглаво одбива да распише избори“.
Лидерот на СНС, Милош Вучевиќ, за реакциите од Брисел изјави:
„Подобро да не коментирам за тие бирократи и нивното размислување. Никогаш не осудија кога некој ќе дојде пред нечија куќа. За госпоѓата Кос, ќе дозволите да го прескокнам одговорот.“
Лопандиќ смета дека западните реакции се недоволно остри и изрази надеж дека ќе бидат „многу покритични кон оние што го предизвикуваат насилството“.
Додека обвинува за лицемерие на Европа, Вучиќ најави средби со Владимир Путин и Си Џинпинг.
