Најпогоден е јужниот дел на Шпанија, каде во Севиља и околните области температурите се движат околу 45°C. Во градот Ел Гранадо е измерена рекордна јуниска температура од 46°C – највисока досега забележана за овој месец, соопшти шпанската национална метеоролошка служба. Според нивните анализи, овој јуни е на пат да стане најтоплиот во историјата на мерењата.
Црвени предупредувања за екстремна топлина се активирани во делови од Португалија, Италија и Хрватска, а бројни региони во Шпанија, Франција, Австрија, Белгија, Босна и Херцеговина, Унгарија, Србија, Словенија и Швајцарија се под портокалови предупредувања.
Во Барселона, една жена починала откако ја завршила смената како уличен чистач – трагедија што се истражува од локалните власти.
Во Италија, болниците пријавуваат зголемен број случаи на топлотен удар, особено кај постари лица, пациенти со хронични заболувања и бездомници. Во Наполи, болницата Ospedale dei Colli воспостави специјални протоколи за итно лекување, вклучително и ладна водена терапија. Во Болоња се отворија седум „климатски засолништа“ со клима уреди и вода, а Рим овозможи бесплатен влез во базени за лица над 70 години.
Во Лисабон, фармацевт изјави за Reuters: „И покрај апелите да не се излегува во најтоплите часови, веќе имаме случаи на топлотни удари и изгореници.“
Температурите над 40°C се регистрирани и во земјите од западниот Балкан. Србија ја измери највисоката температура откако започнало официјалното мерење во 19 век, а Словенија го забележа најтоплиот јуниски ден досега. Северна Македонија исто така се соочува со екстремна жештина – во петокот беа измерени 42°C.
Сè уште потопло во наредните денови
Температурите ќе продолжат да растат до средината на неделата, особено во Франција, Германија, Италија и Обединетото Кралство. Во Лондон се очекуваат до 35°C во понеделник, а во некои делови на Англија се активирани жолти и портокалови предупредувања.
Според метеоролозите, екстремната топлина се должи на силен антициклон кој донесува сув и загреан воздух. Оваа временска состојба ќе се движи кон североисток, носејќи ја топлината со себе.
Иако не секој екстремен временски настан може директно да се поврзе со климатските промени, научниците предупредуваат дека топлотните бранови стануваат сè почести и поинтензивни токму поради глобалното затоплување.
Истражувачите од World Weather Attribution проценуваат дека јуниски топлотни бранови со три последователни дена над 28°C се денес дури 10 пати поверојатни отколку пред индустриската ера.
