Два нови сателита на европскиот навигациски систем „Галилео“ беа успешно лансирани во вселената со ракетата „Аријана 6“ од Европскиот вселенски центар во Француска Гвајана.
Станува збор за 14-то оперативно лансирање во рамките на програмата „Галилео“, со што Европската унија продолжува да ја проширува и зајакнува својата сателитска инфраструктура, објави агенцијата АНСА.
Сателитите, означени како SAT 33 и SAT 34, ќе ја подобрат стабилноста на системот преку додавање резервни капацитети во констелацијата. Нивната намена е да обезбедат континуирана навигациска услуга, 24 часа дневно, за милијарди корисници ширум светот, соопшти Европската вселенска агенција (ESA).
Двата сателита ќе се приклучат на постојната констелација во средната Земјина орбита, на височина од 23.222 километри над површината на планетата.
Програмата „Галилео“ е под управување на Европската комисија, како дел од вселенската програма на Европската унија, додека Агенцијата на ЕУ за вселенска програма (EUSPA) е одговорна за оперативното функционирање на сателитите, од нивното влегување во орбита до крајот на нивниот животен циклус.
Извор: N1info.rs
