Еве како се частат богатите во Давос„Обичен“ билет за Давос чини 35.000 евра, а за пристап до најважните собири и личности треба да се платат стотици илјади евра.
Илјадници највлијателни луѓе во светот оваа недела ги окупираа Швајцарските Алпи, но не и за скијање. Зборуваме за Давос, место каде што се склучуваат глобални зделки и се стекнува политичко и економско влијание, а цената на влезот во тој ексклузивен круг се мери со износи кои, како што велат самите учесници, „на обичните смртници им се врти во главата“. Во овој контекст, хот-догот од 40 евра е само мал трошок.
Оваа недела, некои од најголемите имиња во бизнисот, економијата и политиката се спуштија во Давос за годишниот состанок на Светскиот економски форум (СЕФ), елитен собир кој е строго затворен за јавноста и достапен само со покана.
Ексклузивен клуб на светската елита
Давос во јануари не е место за класично зимување, туку е алпско гратче каде се случува годишното собирање на најмоќните играчи на глобалната сцена. Ексклузивноста произлегува не само од фактот дека настанот е наменет за членовите на СЕФ, туку и од исклучително високата цена на учество.
Иако основните професионални пакети за членство во СЕФ можат да чинат само неколку стотици долари годишно, тие не овозможуваат пристап до Давос. Клучот за влез се корпоративните пакети и спонзорства, кои достигнуваат вртоглави суми.
Некои компании издвојуваат до милион долари за да станат главни спонзори и да го обезбедат своето присуство во Давос. Меѓу нив се технолошките и консултантски гиганти како што се Microsoft и McKinsey, кои, според достапните податоци, инвестирале такви суми за да имаат база за активностите на американските функционери пред доаѓањето на американскиот претседател.
Колку чини билет за Давос?
Официјалните корпоративни пакети на СЕФ, заедно со задолжителната покана, се практично билет за Давос.
Годишните членарини за компаниите почнуваат од околу 75.000 долари, додека статусот „стратешки партнер“ може да чини до 758.000 долари.
Овие пакети им овозможуваат на компаниите да испратат ограничен број на високи раководители, но секој делегат плаќа дополнително за акредитација. Од 2025 година, елитните акредитиви наводно чинат до 35.000 долари по лице.
И тоа се само основните трошоци. Кога ќе се додадат авионските билети, сместувањето, храната и логистиката, вкупната цена за учество за голема глобална компанија лесно надминува шестцифрена сума.
За време на конференцијата, дури и едноставен оброк во Давос може да чини десетици евра.
Што всушност добивате за тие пари
Високата цена, според поддржувачите на Давос, е оправдана со пристапот што го добиваат учесниците. Делегатите имаат пристап до официјални сесии со шефови на држави, затворени панели на теми како што се вештачка интелигенција, енергија и климатски промени, како и учество во индустриските и регионалните „заедници“.
Оние кои плаќаат за најскапите пакети добиваат поголема видливост и директен пристап до врвни функционери.
Тука спаѓаат учество на панели, покани за затворени тркалезни маси, модерирани дискусии меѓу политичари и извршни директори на компании од листата Fortune 500, како и приватни сали за состаноци и брендирани хотелски салони.
Луксуз без граници во Швајцарските Алпи
Сместувањето е посебен предизвик и дополнителен трошок. Давос е мал град со ограничен број хотели и апартмани, а во текот на јануари, цените за ноќевање достигнуваат неколку илјади долари.
Многу извршни директори престојуваат во луксузни планински куќи, таканаречени колиби, кои нудат велнес центри, приватни теретани, џакузи, личен персонал и приватни готвачи. Покрај тоа, тука се и трошоците за приватни асистенти, организација на настани и превоз од аеродромот.
Кој е во Давос оваа година
Секоја година, околу 3.000 делегати се собираат во Давос, вклучувајќи политички лидери, банкари, директори на најголемите светски компании, академици, активисти и културни личности.
Едно од најголемите имиња оваа година е американскиот претседател Доналд Трамп, кој одржа и говор.
Меѓу глобалните бизнис лидери се Џејми Дајмон, Јенсен Хуанг, Брајан Мојнихан и Сатја Надела.
Организаторите на СЕФ наведуваат дека оваа година во давос се присутни рекорден број политички лидери – околу 400, вклучувајќи околу 65 шефови на држави и влади, како и околу 850 водечки извршни директори и претседатели на најголемите светски компании.
