Европска Унија предупреди дека најновите случувања во јеменските провинции Хадрамаут и Ал Махра претставуваат сериозен ризик за стабилноста на регионот на Персискиот Залив.
Во официјално соопштение, портпарол на ЕУ истакна дека Унијата повикува на итно намалување на тензиите и избегнување на чекори кои дополнително би можеле да ја дестабилизираат состојбата во Јемен и поширокиот регион.
„Европската унија ги повикува сите актери на воздржаност и на дејствување што нема да ја загрози стабилноста на Јемен и на целиот регион“, се наведува во соопштението, пренесува Ројтерс.
Во истиот документ, ЕУ ја потврдува својата цврста посветеност на единството, суверенитетот, независноста и територијалниот интегритет на Јемен, како и поддршката за Претседателското раководство и Владата на земјата.
Граѓанската војна во Јемен трае од 2014 година, кога движењето Хути, поддржано од Иран, ја презеде контролата врз северниот дел од земјата, вклучувајќи го и главниот град Сана. По нивното напредување, владата поддржана од Саудиска Арабија беше принудена да се повлече на југ, во градот Аден, но подоцна го напушти и тој град поради напредувањето на силите на Јужниот преоден совет, кои уживаат поддршка од Обединетите Арапски Емирати.
ЕУ предупредува дека новите тензии во источниот дел на земјата можат дополнително да ја продлабочат нестабилноста и да имаат пошироки последици врз безбедноста и трговските рути во регионот на Персискиот Залив.
