Европската унија (ЕУ) бара Русија во рамки на било каков сеопфатен мировен договор да ги повлече своите трупи не само од Украина, туку и од Белорусија, Грузија, Ерменија и одделената молдавска регија Придњестровје. Овој предлог произлегува од интерен документ за дискусија кој високата претставничка на ЕУ за надворешна политика, Кaja Калас, го доставила до земјите членки. Веднаш по тоа, амбасадорите на ЕУ го разгледувале документот на 17 февруари, пишува Kyiv Post.
Радио Слободна Европа имало увид во документот, за кој министрите за надворешни работи би можеле повторно да дискутираат на 23 февруари. Во него се наведуваат ставовите на Брисел за условите на кои Москва мора да се согласи во преговорите посредувани од САД за да заврши војната во Украина.
Повлекување на трупите
Документот бара „забрана на руското воено присуство и распоредување во Белорусија, Украина, Молдавија, Грузија и Ерменија“, како и отстранување на целото нуклеарно оружје од Белорусија.
Руските сили долго време се стационирани во одделените региони на Грузија – Абхазија и Јужна Осетија, во молдавското Придњестровје, во воените бази во Ерменија и во Белорусија, која служела како полазна точка за инвазијата во 2022 година.
Исто така, се наведува дека Русија треба да се соочи со слични обврски доколку Украина биде повикана да ги ограничи бројот на војници или да демилитаризира одредени области. Документот отфрла какво било „де јуре“ признавање на окупираните украински територии и повикува на нивна демилитаризација.
ЕУ на преговарачката маса
Ниту Европската унија, ниту нејзините држави членки формално не се вклучени во преговорите кои ги водат САД. Според документот, трајниот мир не е возможен „без учество на ЕУ на преговарачката маса“ и без почитување на клучните безбедносни интереси на Унијата.
Европските функционери изразиле незадоволство од својата маргинализираност, особено затоа што ЕУ останува најголем финансиски поддржувач на Украина. Објавените мировни предлози предвидуваат и членство на Украина во ЕУ до 2027 година.
Воена одштета и меѓународно право
Покрај повлекувањето на трупите, документот бара исплата на воена одштета, укинување на општата амнестија за воени злосторства и обезбедување целосен пристап на меѓународните истражители. Русија мора да го почитува меѓународното право, а домашното законодавство не смее да има предност пред меѓународните договорни обврски.
ЕУ веќе замрзнала околу 210 милијарди евра од руска државна имотнина, иако државите членки сè уште не постигнале договор за нејзина целосна конфискација.
Патот на Украина кон ЕУ
Дискусијата се одвива во време кога претседателот Володимир Зеленски се залага Украина да биде технички подготвена за пристапување во ЕУ до 2027 година. Претседателката на Европската комисија, Урсула фон дер Лајен, предложила постепен или „обратен“ модел на проширување, според кој Украина би можела да се приклучи на Унијата пред да стекне целосни гласачки и финансиски права.
За пристапување е потребно едногласно одобрување од сите 27 држави членки, а неколку главни престолнини остануваат претпазливи кон забрзување на процесот. Со поврзувањето на повлекувањето на руските сили од Белорусија, Грузија, Ерменија и Придњестровје со решението за Украина, Брисел испраќа порака дека мировниот договор мора да опфати поширок европски безбедносен контекст.
