Европската унија очекува дека нема да биде опфатена со најавеното зголемување на американската универзална царина на 15 отсто, и покрај изјавата на американскиот министер за финансии Скот Бесент дека новата стапка може да стапи во сила веќе оваа недела.
Според неименувани извори на агенцијата Bloomberg, Брисел добил уверувања дека за извозот од Европската унија во САД ќе продолжи да важи царинска стапка од 10 отсто.
Американската администрација претходно најави пошироки трговски мерки кои предвидуваат зголемување на универзалните царини на увозната стока.
Засега, претставници на Канцеларијата на американскиот трговски претставник, како и на Европската комисија (која е надлежна за трговската политика на ЕУ) одбиле да ги коментираат овие информации.
Европската унија е еден од најголемите трговски партнери на САД, па евентуалното зголемување на царините би можело да има значително влијание врз трансатлантската трговија.
