Сите погледи оваа недела се насочени кон самитот меѓу Европската Унија и Индија, кој се одржува во Њу Делхи, а кој би можел да означи пресвртница во нивните економски и политички односи.
По месеци интензивни подготовки и повеќе од десет години преговори, целта на самитот е финализирање на Договорот за слободна трговија меѓу ЕУ и Индија. Договорот предвидува значително либерализирање на трговијата во вредност од милијарди евра, со намалување на царините за европските автомобили и вина, но и проширување на пристапот на индиските производи како електроника, текстил и хемикалии на европскиот пазар.
Претседателката на Европската комисија Урсула фон дер Лајен и претседателот на Европскиот совет Антонио Кошта викендов отпатуваа за Индија, каде што се одржуваат клучните средби. На самитот присуствува и трговскиот комесар Марош Шефчович, кој во интервју за Euronews изјави дека постои „реална политичка волја“ договорот конечно да биде затворен.
Покрај економијата, на агендата е и војната во Украина, уште една тема на која Брисел и Њу Делхи се обидуваат да најдат заеднички позиции. Во Абу Даби завршија дводневните разговори посветени на Украина, во услови кога борбите на теренот продолжуваат со несмален интензитет. Европските претставници ја гледаат Индија како потенцијален дипломатски мост во пошироките меѓународни напори за деескалација.
Во дебатата за трговските односи и геополитичката соработка се вклучи и Томас Бирн, ирски министер за европски прашања и одбрана. Тој нагласи дека ЕУ влегува во клучен период, особено имајќи ја предвид подготовката на Ирска за преземање на претседателството со Советот на ЕУ ова лето.
Во меѓувреме, во рамки на пошироката европска дебата за безбедноста, сè погласни се повиците ЕУ да ја преземе целосната контрола врз сопствената одбрана. Во интервју за Euronews, шпанскиот министер за надворешни работи Хосе Мануел Албарес изјави дека Брисел мора да направи чекор кон создавање европска армија, отворајќи прашања за тоа како таков проект би изгледал во пракса и какви политички и институционални последици би имал.
