Европската комисија денес претстави насоки за заштита на малолетници на интернет и прототип на апликација за проверка на возраста, која треба да го спречи пристапот на деца до штетна и опасна содржина на интернет.
На почетокот, апликацијата за проверка на возраста ќе се тестира во пет земји: Данска, Грција, Шпанија, Франција и Италија. Овие земји први ќе соработуваат со Комисијата на техничко решение со цел создавање национални апликации за проверка на возраста. Прототипот може да се интегрира во национална апликација или да функционира како самостојна апликација, наведува Комисијата.
Целта: сопствени апликации за секоја земја
Целта е секоја земја-членка на ЕУ да развие сопствена апликација, имајќи предвид дека државите имаат различни правила за пристап до одредена содржина на интернет. Тоа ќе им овозможи да ги прилагодат возрастните ограничувања за различни услуги — од веб-страници со порнографија и обложување до социјални мрежи како Instagram или TikTok.
Потврда дека корисникот има над 18 години
Апликацијата ќе им овозможи на корисниците лесно да докажат дека имаат над 18 години кога пристапуваат до ограничена содржина на интернет. Притоа, корисниците ќе имаат целосна контрола врз останатите лични податоци, како што се точната возраст и идентитетот.
Откако апликацијата ќе биде подготвена, корисниците ќе можат да ја преземат и користат за да проверат дали имаат право на пристап до одредени веб-страници и платформи според нивната возраст.
Насоки за поголема безбедност на интернет
Насоките кои ги претстави Комисијата вклучуваат и препораки за справување со онлајн насилство, штетна содржина и несакани контакти меѓу млади и странци. Целта е да се намалат ризиците со кои младите се соочуваат на интернет и да се заштити нивната приватност.
План за верификација на возраст
Комисијата на 14 јули 2025 година ги објави планот за решение за верификација на возраст. Ова решение им овозможува на корисниците да докажат дека имаат повеќе од 18 години без да споделуваат било какви други лични информации. Покрај тоа што ја штити приватноста, решението е кориснички пријатно и целосно е компатибилно со идните дигитални лични паричници на ЕУ.
Решението може лесно да се адаптира за докажување на други возрасни граници, на пример 13+. Планот за верификација на возраст ќе постави стандард во однос на заштитата на приватноста и корисничката удобност.
Наречено и „мини паричник“, решението е изградено врз истите технички спецификации како Европските дигитални лични паричници што треба да се воведат до крајот на 2026 година. Ова обезбедува компатибилност и овозможува интеграција на функцијата за верификација на возраст во идните паричници.
Ова решение доаѓа во форма на софтвер кој сега ќе влезе во пилот фаза на тестирање со земјите членки, онлајн платформи, крајни корисници и други заинтересирани страни, како што се даватели на софтверски решенија, со цел да се прифати од пазарот.
Земјите членки кои ќе го тестираат апликацијата ќе можат да ја прилагодат, на пример, преку превод на национален јазик/јазици. Техничките спецификации, изворниот код и бета верзијата на решението веќе се објавени. Планот за верификација на возраст е отворена имплементација на овие спецификации. Тоа може лесно да се прилагоди од страна на издавачите на апликации, но без можност за менување на функциите за заштита на приватноста. Дизајнот и развојот на ова решение се поддржани преку договор доделен на Т-Ски (Scytales и T-Systems).
