На полуостровот Рејкјанес, јужно од главниот град на Исланд, Рејкјавик, еруптираше вулкан, изфрлајќи лава и дим, што доведе до евакуација на туристи и локално население. Исландската метеоролошка служба објави дека „почна ерупцијата” и дека вкупната должина на еруптивната пукотина сега изнесува околу 1.200 метри, а пукотината продолжува да се протега на југ.
Исланд, познат како „земја на мраз и оган” поради своите бројни ледници и вулкани, забележа 11 ерупции јужно од Рејкјавик од 2021 година, кога се активираа дремечките геолошки системи по околу 800 години.
Вулканот се наоѓа над вулканскиот чвор во Северниот Атлантик. Најпознат и најразорен инцидент во последните децении беше ерупцијата на вулканот Ејафјатлајокул во 2010 година, која испрати огромни облаци пепел во атмосферата и предизвика големи прекини во трансатлантскиот воздушен сообраќај.
Ерупцијата на полуостровот Рејкјанес досега не влијаела директно на Рејкјавик и не предизвикала значително распрснување на пепелот во стратосферата, избегнувајќи прекини во воздушниот сообраќај. Сепак, ерупцијата ја пробила заштитната бариера во близина на рибарскиот град Гриндавик, принудувајќи ги неговите жители на евакуација. Многумина од нив се вратиле по претходните ерупции, иако многу куќи останале празни повеќе од една година.
“Во рамките на бариерата моментално излегува лава, но засега станува збор за многу ограничена ерупција”, изјави Рике Петерсен, шеф на Нордискиот вулканолошки центар.
Итните служби исто така ги евакуирале блиските луксузни термални бањи Blue Lagoon неколку часа пред ерупцијата, откако геолозите предупредиле дека ерупцијата е неизбежна. Исланд, дом на речиси 400.000 луѓе, секоја година привлекува илјадници туристи кои доаѓаат да го истражуваат неговиот кршлив пејзаж, гејзери, топли извори и вулкани.
