Постојат три климатско-економски сценарија кои предвидуваат дека глобалната стапка на ерозија на почвата може да се зголеми за 30 до 66 проценти во периодот од 2015 до 2070 година, според студијата JRC MARS – Crop Monitoring in Europe. Неговото сегашно влијание врз земјоделската продуктивност на глобално ниво се проценува на околу осум милијарди долари.
Првото сценарио се однесува на одржување на глобалното затоплување на помалку од два Целзиусови степени, во споредба со просечните прединдустриски температури и социо-економските предизвици кои носат мерки за ублажување, а второто на трендовите кои генерално ги следат историските обрасци. Третото сценарио е најлошото и се однесува на многу високо ниво на емисии на стакленички гасови и силен развој во употребата на фосилни горива.
Научниците од JRC користеа интегриран квантитативен модел за да го проценат долгорочното влијание ширум светот, за разлика од претходните студии кои се фокусираа на одредени региони.
Загуби од 352 милиони тони род
Во зависност од сценариото, вкупната реална загуба на БДП од 2015 до 2070 година ќе се движи од 216 до 625 милијарди долари на глобално ниво. Тоа изнесува загуба меѓу 0,06 и 0,12 отсто од глобалниот БДП, а годишната загуба би била во опсег од четири до 11 милијарди долари.
Ерозијата на почвата, исто така, може да претставува акутен предизвик за безбедноста на храната во веќе ранливите региони во Африка и тропските предели, каде недостигот на култури како што се маслодајни семиња и зеленчук се потенцијално голема закана. Во најлошото сценарио, глобалните загуби во примарното земјоделско производство би можеле да изнесуваат 352 милиони тони земјоделски култури до 2070 година.
Оваа намалена продуктивност на земјиштето доведува до зголемена побарувачка за него, што исто така ја зголемува потрошувачката по глава на жител. Ова би можело да ја зголеми употребата на земјиштето за потрошувачка на храна на 167.000 км2, што одговара на областа на Тунис, но и зголемена побарувачка за снабдување со вода од 10 милијарди м3.
Што се случува во Европа?
Најпогодени се земјите во Централна и Јужна Африка и Индија, а потоа следат Индонезија и Кина поради зголемената ерозија предизвикана од климатските промени. Европа се смета за област каде што падот на продуктивноста и економијата ќе бидат ниски. Кога станува збор за Европската унија, во сите три сценарија таа би можела да го зголеми своето земјоделско производство поради поголемиот опсег и разновидност во тој сектор, но и до подобар степен на поврзаност со меѓународната трговија, што и овозможува да биде релативно конкурентна.
Научниците од JRC тврдат дека меѓународната трговија помага да се ублажат проблемите на глобалните пазари во борбата против ризикот од пад на светското производство и заканата од пораст на цените на земјоделството. Тие заклучуваат дека поголемото отворање на тие пазари и слободната и фер трговија дополнително би ги намалиле ваквите ризици.
