Врховниот суд на ЕУ ја поништил одлуката на Европската комисија да му одбие на New York Times пристап до пораките што ги разменувале претседателката Урсула фон дер Лајен и генералниот директор на Фајзер, Алберт Бурла, утврдувајќи дека извршната власт на ЕУ не успеала да ги објасни убедливо причините зошто не ги поседува тие пораки.
По долгото натегање меѓу ЕК и NYT околу транспарентноста во врска со договорите за вакцината на Фајзер против ковид-19, Европскиот суд на правдата (ЕСП) денес пресуди дека Комисијата „не дала убедливо објаснение што би оправдало непоседување на побараните документи“, пишува Euronews.
Според судот, Комисијата не може едноставно да тврди дека не ги поседува побараните документи; таа мора да даде веродостојни објаснувања кои им овозможуваат и на јавноста и на Судот да разберат зошто тие документи не можат да бидат пронајдени.
ЕСП утврдил дека NYT поднел релевантни и доследни докази кои укажуваат на постоење текстуални пораки помеѓу претседателката на Комисијата и генералниот директор на Фајзер во врска со набавката на вакцини против ковид-19.
„Овие договори беа целосно без преседан во контекстот на целосно без преседан“, рекол официјален претставник на ЕУ пред пресудата.
Весникот открил постоење на пораките во 2021 година за време на интервју со Бурла, но наишол на пречки при барањето за пристап до нив. Комисијата тврдела дека не може да обезбеди текстови.
По повеќекратни неуспешни обиди да ги добие пораките, NYT покренал процес пред Европскиот суд на правдата во јануари 2023 година.
