Илјадници туристи останаа заглавени на северот на Финска откако летовите на аеродромот Китила беа откажани поради екстремно ниски температури.
Температурата на аеродромот во неделата наутро падна на –37 степени Целзиусови, по неколку дена арктички студ, што значително го отежна одмрзнувањето на авионите и извршувањето на другите неопходни процедури, објави Sky News.
Британските туристи кои се заглавени имаат можност да се вратат дома во понеделник попладне, кога се планирани летови за Манчестер и Лондон. Сепак, според прогнозите на британската метеоролошка служба Met Office, температурите и тогаш ќе бидат околу –28 степени.
Аеродромот Китила се наоѓа во финската Лапонија, ретко населен северен дел од земјата. Иако Финците се навикнати на сурови зимски услови, и тие се погодени од студот кој оваа година е поинтензивен од претходните и зафати големи делови од северна, централна и источна Европа.
Обилните снежни врнежи, силните ветрови и замрзнатите патишта го направија патувањето низ Европа исклучително опасно.
Во Германија, железничкиот сообраќај претрпе сериозни доцнења и откажувања во неделата, откако компанијата „Дојче Бан“ ги суспендираше сите услуги во северниот дел на земјата поради силниот снег.
Властите во германската покраина Северна Рајна-Вестфалија соопштија дека сите училишта во понеделник ќе останат затворени и ќе преминат на онлајн настава поради ледените температури.
Во балтичките земји, Естонија и Литванија, возачите беа повикани да ги одложат сите непотребни патувања поради најавените снежни бури, додека Латвија издаде предупредување за снег во западниот дел од земјата.
Во меѓувреме, обилните снежни врнежи ја погодија и Србија, каде што е прогласена вонредна состојба во 11 општини и градови поради временските непогоди.
Извор: Sky News / Tanjug / AP
