Светската здравствена организација (СЗО) соопшти дека испратила свои експерти за да им помогнат на здравствените власти во Демократска Република Конго да истражат непозната болест која предизвикала смрт на неколку лица во оддалечен дел од оваа африканска земја, пренесува агенцијата Танјуг повикувајќи се на Ројтерс.
Во соопштението се наведува дека експертите на СЗО се на пат за Панзи во југозападната провинција Кванго, каде ќе испорачаат неопходни лекови и опрема која ќе помогне во дијагностицирањето на причината за болеста за да се обезбеди соодветно лекување.
Се истакнува дека ќе бидат објавени повеќе информации за болеста кога ќе бидат достапни.
Десетици смртни случаи
Светската здравствена организација соопшти дека досега се пријавени 394 случаи на инфекција и 30 смртни случаи во Панзи, повикувајќи се на податоците од Министерството за здравство на Демократска Република Конго.
Претходно оваа недела локалните власти соопштија дека од непознатата болест починале 143 лица во оваа регија во текот на ноември.
Ројтерс пренесува изјави на СЗО според кои симптомите на болеста вклучуваат главоболка, кашлица, треска, потешкотии со дишењето и анемија.
