Истражувањето, објавено во списанието Nature Medicine, носи надеж за околу 619 милиони луѓе ширум светот кои живеат со хронична болка во грбот, најчеста форма на инвалидитет на глобално ниво.
Што покажа студијата
Во доцно-фазното клиничко испитување учествуваа 820 возрасни пациенти кај кои претходните не-опиоидни терапии не дале доволно резултати. Половина од нив примале VER-01 – екстракт од канабис произведен од германската компанија Vertanical, а останатите добивале плацебо.
По три месеци, пациентите кои го користеле екстрактот пријавиле намалување на болката за 1,9 поени на скалата од 0 до 10, наспроти само 0,6 поени кај групата со плацебо.
Во продолжението од шест месеци, оние што го примале VER-01 пријавиле дополнително намалување на болката, како и подобрување на квалитетот на спиењето и физичката функција.
Без сериозни несакани ефекти
Најчести несакани појави биле краткотрајна вртоглавица, мачнина и поспаност. Истражувачите нагласуваат дека не биле забележани знаци на злоупотреба или зависност.
„Ова е клинички значајно олеснување на болката, кое може да биде многу важно за луѓето што живеат со хронична болка,“ изјави Јан Волерт, предавач по невронаука на Универзитетот во Ексетер, кој не бил дел од студијата.
Тој предупреди дека резултатите се однесуваат конкретно на екстрактот VER-01 и не треба да се споредуваат со пушење канабис:
„Пушењето канабис и земањето VER-01 се веројатно исто толку различни како јадењето лешници и јадењето Нутела.“
Истражувачкиот тим најави дополнителни студии во кои VER-01 ќе се спореди со стандардните опиоидни третмани за хронична болка во грбот.
Извор: Euronews
