По повеќе од две децении реставрација, Египет ја отвори за јавноста гробницата на фараонот Аменхотеп III, еден од најмоќните владетели на древниот Египет.
Генералниот секретар на Врховниот совет за антиквитети соопшти дека гробницата била дел од тростепен проект за реставрација што го спроведувале експерти од Јапонија. Во рамките на проектот биле обновени и сликите на фараонот и неговата сопруга, кралицата Тија, на ѕидовите на гробницата.
Големата гробница на Аменхотеп III, кој владеел со Египет помеѓу 1390 и 1350 година пред новата ера, се наоѓа на западната страна од Долината на кралевите. Таа била откриена во 1799 година, но нејзината содржина, вклучувајќи го и саркофагот, одамна била ограбена.
Гробницата започнува со премин долг 36 метри и длабок 14 метри, кој води кон главната погребна одаја на кралот и две простории наменети за неговите сопруги, кралиците Тија и Ситамун.
За разлика од многу други гробници во Долината на кралевите, оваа не е целосно украсена. Сликите што се зачувани прикажуваат сцени со Аменхотеп III во друштво на египетските богови, а во погребната одаја се врежани сцени од Книгата на мртвите — збирка магиски текстови кои требало да му обезбедат безбеден премин на покојниот во задгробниот свет.
Отворањето на гробницата доаѓа помалку од еден месец пред свеченото отворање на Големиот египетски музеј во близина на пирамидите во Гиза, што се очекува да биде еден од најголемите археолошки настани во последните години.
Извор: N1info.rs
