На 30 октомври 2025 година (четврток), со почеток во 19 часот, во аудиториум 115 на Архитектонскиот факултет – Скопје при Универзитетот „Св. Кирил и Методиј“, ќе се одржи предавање на м-р арх. Константин Трпеноски на тема „Ефемерна архитектура: Перформативни простори“. Настанот е дел од воннаставната програма ДОСИЕ АФС, чија цел е да поттикне интердисциплинарен дијалог помеѓу архитектурата, уметноста и современите културни практики.
Константин Трпеноски (1984) е архитект и сценограф со богат меѓународен професионален опус. Дипломирал на Архитектонскиот факултет во Скопје, а магистрирал на Техничкиот универзитет во Виена под менторство на прочуениот архитект William Alsop. Неговата работа се движи на пресекот меѓу сценскиот дизајн и концептуалната архитектура, со посебен интерес за истражување на границите помеѓу уметничкиот израз и архитектонската форма.
Како основач на студиото MVV.DESIGN, Трпеноски има реализирано бројни проекти во Македонија и во странство, учествувал на повеќе изложби за архитектура и дизајн, и е добитник на неколку значајни награди:
– Прва награда за идејно решение за пешачки мост на реката Дрим во Струга (2011)
– Прва награда за урбанистичко решение за просторот околу железничката станица во Велс, Австрија (2018)
– Две втори награди за идејни архитектонски решенија за едукативен кампус во Виена (2013 и 2024)
Во областа на сценографијата, Трпеноски двапати е добитник на наградата за најдобра сценографија на фестивалот „Војдан Чернодрински“ во Прилеп, во 2019 и 2023 година.
Предавањето „Ефемерна архитектура: Перформативни простори“ ќе се осврне на архитектурата како жив процес, на временоста на просторот, и на тоа како архитектонските концепти можат да станат дел од сценската и перформативната уметност. Публиката ќе има можност да слушне како Трпеноски ја поврзува архитектурата со театарот, урбаните инсталации и јавните простори што живеат само во одреден миг.
Настанот е отворен за јавноста, со цел да го поттикне критичкото размислување за улогата на архитектурата во современиот културен контекст.
