Една нова студија открива дека доколку јадеме само едно јајце на ден ќе го намалиме ризикот од деменција. Се повеќе истражувања сугерираат дека јајцата може да го подобрат здравјето на мозокот.
Според новата студија, за која истражувачите велат дека треба да се прошири, зголемувањето на внесот на јајца, исто така, може да има позитивен ефект врз меморијата и во намалувањето на ризикот од деменција.
Јајцата се богати со хранливи материи и добар извор на холин, фолна киселина, витамин Д, јод, витамини од групата Б и висококвалитетни протеини. Заштитниот ефект на дневниот внес на јајца против деменција кај постарите возрасни може да се објасни со присуството на биоактивни соединенија, како и висококвалитетни протеини, незаситени масни киселини и витамини.
Јајцата можат да понудат заштита од когнитивно опаѓање
Студијата анализирала двегодишни податоци од 233 лица со деменција и исто толку здрави учесници од Гуангжу, Кина, со просечна возраст од 74 години. Истражувачите се фокусирале на кинеската популација бидејќи Кина има најголем број на луѓе со деменција.
Навиките во исхраната биле категоризирани според количината на конзумирани јајца: никогаш, едно месечно, едно неделно, едно дневно и две или повеќе на ден. Резултатите покажале дека помалиот внес на јајца го зголемува ризикот од деменција и нарушена меморија. Учесниците кои јаделе јајца неделно имале 1,76 пати поголеми шанси да развијат деменција, додека оние кои јаделе јајце месечно имале повеќе од 4 пати поголем ризик.
Овие наоди ги потврдуваат претходните истражувања кои сугерираат дека јадењето повеќе од едно јајце неделно може да го намали ризикот од Алцхајмерова болест.
Зошто јајцата го зајакнуваат мозокот?
„Со оглед на тоа што јајцата имаат исклучителен нутритивен профил, врската помеѓу нивното внесување како дел од здравата исхрана и намалениот ризик од деменција не беше особено изненадувачка за нас“, вели д-р Елизабет Милс, вонреден директор за стареење и превенција на Алцхајмерова болест. Таа нагласи дека учесниците кои редовно јаделе јајца, исто така, имаат тенденција да јадат друга храна богата со хранливи материи, како месо, зеленчук и овошје.
„Јајцата содржат различни хранливи материи поврзани со здравјето на мозокот кои се во форма која лесно се апсорбира и користи од телото“, вели Милс
Ова може да објасни зошто особено јајцата може да го намалат ризикот од деменција.
„Јајцата се целосен протеин, што значи дека ги содржат сите девет есенцијални амино киселини – оние што телото не може да ги произведе самостојно“, вели Милс.
Еден од клучните хранливи материи за градење на мозокот кој се наоѓа во изобилство во јајцата е холинот (суштинска хранлива материја која е од големо значење за здравјето на телото, особено за функционирањето на мозокот, црниот дроб и нервниот систем).
Дали јајцата имаат корисен ефект врз здравјето на срцето?
Во минатото, лекарите предупредуваа дека јајцата можат да бидат штетни за здравјето на срцето поради високите нивоа на холестерол во жолчките, за кои се сметаше дека го зголемуваат ризикот од срцеви заболувања. Тоа мислење е многу променето со текот на времето, а неодамнешните големи студии покажаа дека холестеролот во едно јајце дневно е безбеден за повеќето луѓе.
Авторите посочуваат дека овие наоди бараат дополнително истражување.
„Како целосен протеин густ со хранливи материи, јајцата можат да бидат дел од целокупната здрава исхрана за мозокот кога се комбинираат со друга храна здрава за мозокот, како што се зеленчук, овошје и цели зрна“, вели Милс.
