Според холандскиот портал NL Times, пратениците во предлогот истакнуваат дека возраст од 15 години треба да се постави како стандардна граница за пристап до друштвените мрежи. Во документот јасно се наведува дека “проблемот со зависноста е штетен за сите возрасти, а децата чии мозоци сè уште не се целосно развиени, мора да бидат заштитени”.
Предлогот посочува и на загриженоста за неспособноста на технолошките гиганти да обезбедат безбедно и здраво дигитално опкружување за најмладите корисници, што довело до реакција кај законодавците.
Баланс помеѓу заштитата и дигиталните потреби на младите
Ханеке ван дер Верф, една од клучните потписнички на овој предлог, изрази длабока загриженост за дизајнот на друштвените платформи кои намерно содржат елементи кои предизвикуваат зависност. Сепак, таа истакна и потребата од избалансиран пристап.
„Од друга страна, не сум против тоа 13-годишниците да можат нормално да испратат порака до своите родители дека се враќаат дома од тренинг во 9, наместо во 8 часот вечерта“, нагласи ван дер Верф, покажувајќи разбирање за практичните комуникациски потреби на младите во дигиталната ера.
Иницијативата доаѓа во моментот кога државниот секретар за младите, превенција и спорт, Винсент Кареманс, веќе најави конкретни чекори. Тој минатиот месец најави изработка на препораки за минимална возраст за пристап до друштвените мрежи, како и насоки за препорачаниот број на часови што децата треба да ги поминат пред екранот.
Холандските пратеници сега бараат од Кареманс да ја прошири својата иницијативата и да воспостави соработка со други земји за креирање ефективни меѓународни правила кои ќе ги обврзат технолошките компании на одговорно однесување кон малолетни корисници.
Овој потег на Холандија доаѓа во време кога и други земји преземаат слични мерки. Австралија неодамна најави уште построг пристап, со план да ја забрани употребата на друштвените мрежи за лица помлади од 16 години, што покажува глобален тренд на построга регулација на влијанието на друштвените платформи врз малолетни корисници.
