Единсон Кавани (39) се соочува со еден од најтешките периоди во својата кариера. Комбинацијата од повреди и невообичаени грешки за напаѓач од негов калибар го ставија под притисок од навивачите и критичарите на Бока Јуниорс.
Минатата сабота, во ремито без голови меѓу Бока и Расинг (0:0), дел од навивачите на Бока го испратија Кавани со свирежи при неговата замена. Легендарниот аргентински фудбалер Оскар Руџери (64) изјави дека, иако е жално да се гледа таква реакција кон играч со толку богата кариера, можеби е време Кавани да размисли за пензија.
„Грев е таква ѕвезда да се навредува, со оглед на сè што постигнал. Но, тешко е да се игра во нашата лига на 40 години. Сè уште не завршува затоа што сака да се обиде да ја промени ситуацијата пред заминување“, изјави Руџери, кој има 97 настапи за Аргентина и беше светски шампион во 1986 година.
Блескава европска кариера
Кавани ја започна професионалната кариера во уругвајскиот Данубио, а европскиот пробив го направи во Палермо. Од 2010 до 2023 година настапуваше за Наполи, Пари Сен-Жермен, Манчестер Јунајтед и Валенсија. Освои 24 клупски трофеи, со Уругвај ја освои Копа Америка, а осум пати беше најдобар стрелец во различни натпреварувања.
Во Бока Јуниорс пристигна во 2023 година и досега има 28 голови и три асистенции во 81 настап. Договорот му истекува на крајот од годината, а сè уште не е познато дали ќе биде продолжен.
