Најмалку едно лице загина, а други три се повредени откако рано утринава се урна товарен авион во близина на аеродромот во Вилнус во Литванија.
Боингот 737 упатен од Лајпциг и управуван од шпанската карго авиокомпанија „Свифтаир“ се сруши во близина на куќа додека бил пред слетување, соопштија локалните власти.
Според досегашните податоци, авионот тргнал од центарот на ДХЛ од аеродромот во Лајпциг веднаш по 03:00 часот по локално време и се урнал час и половина подоцна. Причината за несреќата е непозната, а литванските власти започнаа истрага. Тие изјавија дека засега немаат никакви податоци што укажуваат дека имало експлозија пред несреќата.
Шефот на литванската противпожарна и итна помош соопшти дека едно лице од екипажот починало и дека куќа во близина на несреќата била малку оштетена, но сите 12 станари се безбедно евакуирани.
Авионот бил стар 31 година.
