Британија, Франција и Германија — познати како тројката Е3 — најверојатно ќе го започнат процесот за повторно активирање на санкциите на ОН против Иран во четврток, но се надеваат дека Техеран ќе даде уверливи гаранции за својот нуклеарен програм во рок од 30 дена, со што би се одложиле конкретните чекори, соопштија дипломати.
Е3 се сретна со претставници од Иран во вторникот, во обид да се оживее дипломатијата околу иранскиот нуклеарен програм, пред истекот на рокот во средината на октомври, по кој тројката ја губи можноста за враќање на санкциите укинати со нуклеарниот договор од 2015 година.
Тројца европски дипломати и еден западен дипломат изјавија дека разговорите не резултирале со доволно конкретни обврски од страна на Иран, иако веруваат дека има простор за понатамошни дипломатски иницијативи во наредните недели.
Според нив, Е3 решила да го активира механизмот за повторно воведување санкции на ОН, можно уште во четврток, поради наводно прекршување на договорот од страна на Иран. Целта на договорот од 2015 година беше да се спречи Иран од развој на нуклеарно оружје.
Западните земји тврдат дека напредокот на иранската нуклеарна програма ги надминува цивилните потреби, додека Техеран негира дека има намера да развива оружје.
Процесот во рамки на ОН трае 30 дена, по што би се активирале повторно санкциите — кои вклучуваат ограничувања во финансискиот, банкарскиот, енергетскиот и одбранбениот сектор на Иран.
„Вистинските преговори ќе започнат откако писмото ќе биде поднесено до Советот за безбедност на ОН“, изјави еден западен дипломат кој побара да остане анонимен.
Портпаролот на германското министерство за надворешни работи потврди дека повторното воведување санкции останува опција за Е3. Британското и француското МНР не дадоа коментар.
Техеран, пак, предупреди дека ќе следи „остар одговор“ доколку санкциите бидат повторно воведени, пренесува Reuters.
