Најстарата копнена желка во светот, Џонатан, и покрај гласините за нејзината смрт, е жива и продолжува да живее на островот Света Елена. Дезинформацијата се прошири на социјалните мрежи, но беше брзо демантирана од официјални извори.
Џонатан, џиновската желка од Сејшели, која има околу 193 години, сè уште е жива и активна, и покрај виралните објави за нејзината наводна смрт. Таа продолжува да се движи низ дворот на резиденцијата на гувернерот на островот Света Елена, каде живее со децении.
Гласините за нејзината смрт се појавија на 1 април и брзо се проширија на социјалните мрежи. Лажен профил на платформата X, кој се претставувал како ветеринарот Џо Холинс, објавил порака во која тврдел дека желката починала. Подоцна било потврдено дека профилот е измама, а самиот Холинс појаснил дека нема официјален профил на таа мрежа.
Џонатан е впишан во Гинисовата книга на рекорди како најстара живо копнено животно и најстарата желка во историјата. Се проценува дека имал околу 50 години кога бил донесен на островот Света Елена во 1882 година.
И покрај својата возраст, Џонатан и натаму покажува активност и се движи низ својот простор, што ја прави вистинска реткост во животинскиот свет.
Фотографии објавени од властите на островот го прикажуваат како мирно се движи низ дворот, што дополнително ги демантираше гласините.
Островот Света Елена е познат и по историското значење, бидејќи таму бил прогонуван Наполеон Бонапарта по поразот кај Ватерлоо во 1815 година – многу пред Џонатан да стане негов долгогодишен жител.
