Градоначалникот Адријан Мап изрази сочувство за загубата на четири животи во кус временски период, потсетувајќи дека две лица загинаа и за време на силните бури кои го зафатија регионот на почетокот од месецот.
Поради интензивните врнежи и ризикот од поплави, гувернерот на Њу Џерси, Фил Марфи, прогласи вонредна состојба. Олујите го погодија и североистокот на САД, вклучувајќи го и Њујорк, каде што беше издадено предупредување за поплави за сите пет општини на градот. Граѓаните беа повикани да избегнуваат подруми и ниско поставени подрачја.
Невремето предизвика хаос во авио-сообраќајот на најмалку шест големи аеродроми на источниот брег на САД. Аеродромите ЏФК и Ла Гвардија во Њујорк, како и Њуарк Либерти во Њу Џерси, добија наредба за привремено приземјување на летовите, што доведе до повеќечасовни доцнења.
Слична состојба беше регистрирана и на аеродромите во Филаделфија, Балтимор и Вашингтон.
Според Националната метеоролошка служба, во некои делови од Њујорк наврнале меѓу 50 и 75 милиметри дожд за кратко време.
Градските служби дополнително издадоа предупредување за екстремна топлина и нови можни поплави, со температури кои може да достигнат или надминат 38 степени Целзиусови.
Големиот број откажани и одложени летови предизвикаа хаос кај патниците, кои пријавуваа долги задржувања на аеродромите и пренасочувања на летовите, што дополнително ги усложни патувањата во вечерните часови.
