Пред точно две години, во близина на Темпи во централна Грција, дојде до судир помеѓу патнички и товарен воз, при што загинале 57 лица, а околу стотина патници беа повредени. Оваа трагична несреќа предизвика протести низ целата земја, насочени против лошата состојба во железничкиот сектор и одговорноста на челните луѓе. Вчера на годишницата од несреќата, на улиците на Атина и други градови повторно имаше илјадници луѓе кои бараа одговорност за несреќата.
Иако собирот започна како мирен, организиран од страна на семејствата на загинатите, брзо прерасна во хаос. Во центарот на Атина дојде до судир помеѓу демонстрантите и полицијата, а грчките медиуми пренесуваат дека полицијата одговорила со солзавец и шок бомби на протестантите кои фрлале молотови коктели.
Според податоците на локалната полиција, во Атина учествувале околу 170.000 луѓе, додека во цела Грција, вклучувајќи го и Солун, бројот на демонстранти надминал 325.000, при што биле уапсени најмалку 150 лица.
Паралелно со протестите, синдикатите покренале 24-часовен штрајк на национално ниво, што предизвикало хаос во јавниот превоз и јавните установи. Според медиумските извештаи, штрајкот го поддржале и приватниот сектор, затворајќи продавници неколку часа во текот на денот.
Демонстрантите и штрајкувачите како основен повод за незадоволство ја истакнуваат неадекватната реакција на властите по несреќата. Истражата за трагедијата сѐ уште трае, но никој не е осуден, додека владата на премиерот Кириакос Мицотакис негира било каква одговорност. Анкетите покажуваат дека помеѓу 70 и 80 отсто од граѓаните веруваат дека владата се обидела да ги прикрие доказите за поврзаноста со несреќата, а опозицијата најавила гласање за недоверба на владата следната недела.
