Аферата поврзана со Џефри Епштајн повторно ја разниша светската политика, но со сосема различни последици од двете страни на Атлантикот. Додека во Велика Британија премиерот Кир Стармер се соочува со сериозна политичка криза поради врските на негов поранешен министер со Епштајн, во Соединетите Американски Држави претседателот Доналд Трамп, чие име исто така се појавува во досиејата, не трпи никакви последици.
Иако Стармер лично никогаш не бил поврзан со Епштајн, неговата позиција станува сè понесигурна поради аферата со лорд Питер Манделсо, поранешен министер и близок соработник, кој одржувал контакти со осудениот финансиер и по неговата пресуда во 2008 година. Новообјавените документи сугерираат дека Манделсон можеби споделувал доверливи и пазарно чувствителни информации со Епштајн за време на финансиската криза, што отвори можност за кривична истрага.
Под притисок на јавноста и на сопствената партија, Стармер беше принуден јавно да признае дека знаел за односите меѓу Манделсон и Епштајн, и покрај тоа што подоцна го именувал за амбасадор во Вашингтон. По новите откритија, Манделсон поднесе оставка од Домот на лордовите и ја напушти Лабуристичката партија, извинувајќи им се на жените и девојките кои биле жртви на Епштајн.
„Манделсон ја предаде нашата земја, парламентот и мојата партија“, изјави Стармер во британскиот парламент, додека растат шпекулациите за можен внатрепартиски предизвик за неговото лидерство – помалку од две години по убедливата изборна победа.
Во исто време, скандалот има далекусежни последици и за британското кралско семејство. Јавниот гнев поради врските на принцот Ендру со Епштајн доведе до тоа кралот Чарлс Трети да му ги одземе кралските титули и да го отстрани од јавниот живот потег што нема преседан во САД.
Наспроти тоа, во Америка, и покрај тоа што името на Доналд Трамп се споменува во дел од објавените досиеја, Министерството за правда соопшти дека нема да има дополнителни обвиненија. Не се подигнати обвиненија ниту против Трамп, ниту против други лица наведени во документите, а дел од тврдењата сè уште се непроверени.
Трамп изјави дека „е време земјата да продолжи понатаму“, користејќи ја својата политичка моќ и контролата врз Републиканската партија за да ја минимизира штетата. Аналитичарите оценуваат дека неговата стратегија е да ја „преплави јавноста со кризи“, со што поединечните скандали губат тежина.
Според анализата на CNN, разликата меѓу Британија и САД лежи во политичките системи и механизмите на одговорност. Додека во Лондон институциите, медиумите и јавноста вршат силен притисок, во Вашингтон претседателот е заштитен од фиксниот мандат, контролата врз партијата и Министерството за правда.
Во меѓувреме, жртвите на Епштајн продолжуваат да бараат правда, додека неговите досиеја кои сега допираат и до Европа потсетуваат дека скандалот не завршил со неговата смрт во затвор во 2019 година.
