Во раните утрински часови, пожар избувна во складишта што им припаѓаат на странски нафтени компании западно од Басра, откако објектите биле погодени во напад со дрон, јавува Reuters повикувајќи се на безбедносни извори. Засега нема официјални информации за жртви, ниту за точниот обем на штетата.
Инцидентот доаѓа во момент кога ирачката нафтена инфраструктура веќе е под силен притисок од пошироката војна во регионот. AP објави дека нападите со дронови и ракети врз нафтени полиња, инфраструктура и компании дополнително ја парализираат работата во Басра, кој е клучен ирачки нафтен центар.
Ова не е прв ваков удар во последните денови. На 28 март дрон веќе имаше паднато во нафтеното поле Мајнун во Басра без да експлодира и без материјална штета, што покажува дека заканата за енергетските капацитети во јужен Ирак трае веќе подолго.
Во позадина на овие напади стои и поширок економски ризик. Според AP, поради затворањето на Ормускиот Теснец и влошената безбедносна состојба, ирачкото производство и извоз на нафта веќе се сериозно нарушени, а дел од странските компании и работници почнале да го напуштаат Ирак.
