Дрон што влегол од рускиот воздушен простор удрил во оџак на електраната Аувере во североисточна Естонија, соопшти естонската служба за внатрешна безбедност. Во инцидентот нема повредени, а истрагата е во тек.
Инцидентот се случил околу 3:43 часот, а според досегашните информации, нема повредени.
Електраната Аувере се наоѓа во североисточниот дел на Естонија, во близина на руската граница. Естонските власти засега не соопштуваат повеќе детали за потеклото и типот на леталото, но потврдуваат дека истрагата ја водат безбедносните служби и обвинителството.
Овој инцидент доаѓа само неколку дена по друг безбедносен спор меѓу Талин и Москва, кога Естонија соопшти дека руски борбен авион го нарушил нејзиниот воздушен простор. Новиот случај дополнително ја засилува чувствителноста околу безбедноста на источната граница на НАТО.
