Шведската војска блокирала дрон што бил забележан во близина на францускиот носач на авиони Charles de Gaulle, кој во моментот е закотвен во пристаништето во Malme.
Според шведската влада, постои голема веројатност леталото да е од руско потекло.
Француската армија соопшти дека дронот бил забележан на околу седум наутички милји (приближно 13 километри) од носачот на авиони, кој за првпат престојува во Шведска и треба да учествува во НАТО-вежби во регионот.
Кристерсон: „Не е случајност“
Говорејќи од палубата на носачот, шведскиот премиер Кристерсон изјави дека инцидентот е сериозен, но не и изненадувачки.
„Многу е тешко ова да се сфати како случајност. Ова е руски начин на дејствување што веќе сме го препознале на други места“, рече Кристерсон.
Од друга страна, портпаролот на Кремљ, Димитри Песков, ги отфрли шведските обвинувања како „апсурдни“.
Зачестени дрон-инциденти во регионот
НАТО-сојузниците со месеци пријавуваат забележувања на беспилотни летала во близина на воени бази и аеродроми, особено во Данска и балтичките држави.
Во декември беше отворена истрага откако дронови прелетале над француската поморска база Ил Лонг кај Брест, каде што се стационирани нуклеарни балистички подморници.
Шведскиот министер за одбрана Pal Jonson изјави дека постои „силна поврзаност“ меѓу дронот и руски воен брод што во тоа време се наоѓал во шведските територијални води во теснецот Оресунд, меѓу Шведска и Данска.
Не е познато што се случило со дронот по електронското попречување, но според Јонсон, рускиот брод потоа се упатил кон Балтичкото Море.
Франција: „Робустен одговор“
Францускиот министер за надворешни работи Џан Ноел Барот, кој во петокот престојуваше на носачот заедно со шведскиот премиер, го пофали шведскиот одговор.
„Доколку навистина станува збор за потенцијално руско потекло, тогаш тоа би било смешна провокација“, изјави тој пред новинарите.
Француската армија соопшти дека инцидентот не влијаел врз мисијата на носачот, истакнувајќи ја „робустноста“ на шведскиот безбедносен одговор.
Поранешниот француски воен претставник во ОН, генерал Доминик Тринкван, оцени дека евентуалното руско извидување во близина на Малме не би било изненадување.
„Фактот што тоа се случува додека француски носач на авиони е распореден таму испраќа јасна стратешка порака“, изјави тој за француските медиуми.
Мисија „La Fayette 26“ – сигнал кон Москва
Носачот на авиони „Шарл де Гол“ пристигна во Шведска како дел од мисијата La Fayette 26, во рамки на која ќе учествува во повеќе однапред планирани НАТО-вежби во Балтикот и Атлантикот, вклучително и крај брегот на Норвешка.
Оваа мисија се толкува како директен одговор на руските хибридни активности во регионот во изминатиот период.
Носачот располага со сопствена поморска придружба и борбени авиони „Рафал“, но во територијални води се потпира на заштитата на земјата домаќин.
Паралелна истрага за излевање гориво
Во меѓувреме, шведската крајбрежна стража отвори истрага за излевање гориво во пристаништето во Малме, каде што покрај носачот се закотвени и два нафтени танкера.
Иако причината засега не е позната, локалните власти посочија дека инцидентот не е поврзан со францускиот воен брод.
Инцидентот дополнително ги засилува тензиите во северна Европа, каде што Балтичкиот регион станува сè почувствителна геополитичка точка во односите меѓу НАТО и Москва.
