Дресерот Адам Спајви ги предупреди сопствениците да не ги шетаат своите кучиња веднаш по оброкот, опишувајќи го тоа како „едно од најопасните нешта што можете да ги направите како сопственик на куче“.
Спајви објасни дека шетањето на кучето по јадење може да доведе до сериозна состојба позната како гастрична торзија или „ надуеност “, пишува „Дејли меил“.
„Ако го храните вашето куче пред прошетка, навистина е важно да му дадете најмалку 45 минути до еден час за одмор пред каква било физичка активност“, рече тој.
Тој додаде дека лесните вежби се во ред, но сериозните вежби треба да почекаат, објавува Index.hr.
„Мора да ѝ дадете време на храната да се смири“, објасни тој.
Ветеринарите се согласуваат
Спајви нагласи дека не само што е побезбедно да го храните кучето по прошетка, туку тоа може да му го подобри апетитот и да ја намали пребирливоста при јадење.
„Кучето ќе биде погладно откако ќе потроши енергија“, рече тој, додавајќи дека ако го храните по активност, поголема е веројатноста да биде помалку пребирливо.
Предупредувањето го повторија ветеринарите , кои објаснија дека торзијата на желудникот е многу опасна состојба што се развива брзо и често е фатална.
Според нив, надуеноста се јавува кога стомакот на кучето се полни со гасови, течности или храна и врши притисок врз околните органи и крвни садови.
Во тешки случаи, желудникот може да се извитка, прекинувајќи го протокот на крв до виталните органи и предизвикувајќи шок.
Торзија на желудникот е пријавена кај кучиња од сите раси.
Кучиња како што се големите доги, германските овчари, поинтерите, мастифите, ротфајлерите, боксерите и хртовите се изложени на најголем ризик. Но, состојбата е пријавена кај речиси сите други раси, вклучувајќи ги и помалите кучиња.
Вообичаени причини вклучуваат брзо јадење, прејадување, пиење големи количини вода одеднаш, подигнати чинии со храна, стрес, генетика и, најважно, вежбање по јадење.
