Под мотото „Каде застанавме?“, вчера вечер се одржаа протести во повеќе градови ширум Србија.
Во Белград, Жандармеријата интервенираше и ги потисна демонстрантите. Откако беше скршен излогот на просториите на Српската напредна странка (СНС) на улицата Цвијиќева во Белград, на терен стигнаа единици на Жандармеријата.
Тие најпрво ги растераа собраните граѓани, испукаа неколку шок бомби, а потоа со возила тргнаа кон демонстрантите кои се повлекуваа пред полицијата. Сето ова се случуваше на крстосницата меѓу Цвијиќева и улицата Здравко Челар.
Во Пожаревац, пред просториите на СНС, по повик на студентите се собраа граѓани, а од другата страна стоеја поддржувачи на владејачката партија.
Собирот влезе во четвртиот час, протекува мирно, без инциденти, со повремени повици и свирежи, јави радио Boom93. Учесниците на протестот донесоа звучници и пуштаа музика, меѓу кои песните „Да се живее слободно“ од Ѓорѓе Балашевиќ, „Паѓа владата“ од Бајага, како и студентската химна „Freed from desire“ од Гала.
Радиото објави на Instagram дека неколку вечери по ред, граѓаните се собираат за да го изразат своето незадоволство од полициската бруталност.
Поддржувачи на СНС се наоѓаа од двете страни на тротоарот на улицата Синѓелиќ, како и на коловозот, а многумина носеа знамиња на Србија.
