Малите сипаници се заболување кое се пренесува преку воздухот, често предизвикувајќи осип и висока температура, што може да биде исклучително опасно за малите деца: во 2023 година, тие однесоа околу 107.000 животи ширум светот.
„Малите сипаници се вратија во Германија“, велат од Институтот Роберт Кох (РКИ). Во текот на 2024 година, забележан е неверојатен пораст на бројот на заболени од оваа болест, која е особено честа кај малите деца и може да биде фатална. Досега се регистрирани 614 случаи, што е огромен скок во однос на само осум случаи пред три години, пишува Дојче веле.
Од 2019 година, родителите во Германија се законски обврзани да ги вакцинираат децата со двете дози потребни за целосен имунитет. Во спротивно им се заканува казна од 2.500 евра.
Други болести кои се спречуваат со вакцини, како што се хепатитис Б и голема кашлица, исто така се во пораст. Експертите наведуваат дека причините за тој скок се сложени и повеќекратни – од имиграција и пандемијата на корона вирусот, до растечки скептицизам кон вакцините и антивакцинскиот активизам на Интернет.
„Речиси сите стапки на заразни болести паднаа за време на пандемијата“, вели педијатарот од Бон, д-р Аксел Гершлауер, објаснувајќи дека мерките како што се социјалното растојание и носењето маски одиграле клучна улога.
Истовремено, додава тој, се уште се присутни и други последици, на пример во форма на „неподготвеност да се оди на лекар освен во најнеопходните случаи, поради стравот од инфекција во ординацијата“.
Проблем се и увезените случаи. Д-р Карела Езваран од Келн за јавниот сервис АРД изјави дека денес многу луѓе патуваат. Во исто време, додава таа, „има многу имигранти, вклучително и деца од воените зони, каде што не се достапни вакцини“. Таа наведува дека овие родители можеби не се свесни за обврската да ги вакцинираат своите деца кога ќе пристигнат во Германија.
Тука е и проблемот со скептицизмот за вакцините и движењето против вакцините. Д-р Гершлауер предупредува дека двата феномени мора да се разгледуваат одделно.
„За скептичните родители, стравовите и сомнежите често може да се отфрлат со објаснувања и статистики. Понекогаш е доволно да поделите информативен леток или да имате краток разговор“, вели тој. Меѓутоа, „со ‘закоравените’ противници на вакцините, рацете ни се врзани. Тие живеат во сопствен балон, кој повеќе не можеме да го скршиме однадвор“.
Според истражувањето на компанијата „Статиста“ објавено во ноември, скептицизмот кон вакцините во Германија расте – од 22 отсто од возрасните кои биле скептични во 2022 година, на 25 отсто во 2024 година.
Што се однесува до „тврдокорното“ движење против вакцините, тоа има долга историја во Германија, која датира од 1800-тите. Движењето беше промовирано од различни групи, од антисемитските претходници на нацистите, кои со скептицизам гледаа на медицинските достигнувања на еврејските лекари, до медицинските кругови загрижени за безбедноста на вакцините во тоа време.
Според податоците на Федералниот центар за здравствена едукација (БзгА), бројот на луѓе кои се изјаснуваат „целосно против вакцините“ е малку зголемен во текот на изминатите децении, од четири проценти во 2004 година на шест проценти во 2020 година.
Нивниот број се чини уште поголем поради присуството на социјалните мрежи и протестите против вакцините што беа организирани за време на пандемијата на корона.
Во овој контекст, дел од лекарите сметаат дека задолжителните вакцини се контрапродуктивни, бидејќи делуваат како да ги ограничуваат личните слободи, што дополнително ја разгорува опозицијата.
Истражувањата покажаа други значајни индикатори за отпорност на вакцини. Неодамнешниот извештај на лекарите од Универзитетот во Фрајбург покажа врска помеѓу она што тие го нарекуваат „езотерично размислување“ и скептицизмот за вакцините.
На пример, луѓето кои веруваат во хомеопатијата или поминале низ алтернативни форми на образование се повеќе склони да заземат критички став кон вакцините.
Друга студија, спроведена во 2021 година во Саксонија, откри корелација помеѓу приврзаниците на десничарската партија Алтернатива за Германија (AfD) и скептицизмот за вакцините.
