Два автобуса со 88 ученици и 12 придружници денес заглавија на патот Дивчибаре – Каона поради обилни снежни врнежи, соопшти Министерството за внатрешни работи на Србија.
Во објавата на официјалниот Инстаграм профил на МВР, се наведува дека веднаш на теренот излегле пожарникари-спасувачи од Ваљево и Дивчибаре, со поддршка од јавното претпријатие „Србијашуми“
Изјава од МВР:
„Шест спасувачи со три возила организираа пренос на децата до блискиот хотел, каде што беа безбедно згрижени. Кога снегот го затвора патот, тие отвораат нов. За секое дете. Секогаш“, стои во соопштението на МВР.
Времето се влошува – РХМЗ со ново предупредување:
Републичкиот хидрометеоролошки завод (РХМЗ) издаде предупредување за обилни врнежи во јужна, централна и источна Србија, а во планинските подрачја се очекува и снег.
„Обилни врнежи се очекуваат во југозападните, јужните, централните и источните делови на Србија, со нови 30 до 50 mm, а локално и преку 60 mm дожд. Попладне и навечер се очекува постепено намалување на интензитетот на врнежите“, објави РХМЗ.
