Вроденото криво стапало е најчест деформитет на мускулноскелетниот систем кај децата, кој се појавува кај едно од 700 до 1.000 новороденчиња. Во македонски услови, тоа значи околу 20 до 30 нови случаи секоја година. Д-р Милена Богојевска Доксевска, е ортопед-хирург и прв сертифициран експерт за Понсети методата во Централниот Балкан, метода која претставува златен стандард во лекувањето на вроденото криво стапало кај новороденчињата, состојба позната и како талипес еквиноварус.
Понсети методот е неоперативен пристап кој започнува уште во првите недели по раѓањето. Се состои од три фази: Прецизна манипулација на стапалото и сериско гипсирање неделно (3-10 недели), минимална хируршка интервенција – пресекување на Ахиловата тетива во локална анестезија и олгорочно носење ортоза до петтата година – специјални сандали поврзани со шипка за спиење.
Со оваа метода, децата се спасуваат од агресивни операции и имаат нормален живот, без болки и ограничувања. -Резултатите се одлични – децата се движат без болка, учествуваат во спорт и имаат квалитетен живот, вели д-р Милена.
Сертификацијата за оваа метода е исклучително ригорозна. Таа започнала со двонеделен престој во Универзитетската болница во Ајова, САД, каде д-р Милена имала можност да учи директно од проф. Хозе Моркуенде, наследникот на д-р Игнасио Понсети – основоположникот на методата. Понатаму, следеле неколку години документација, практична примена на методот кај 30 пациенти и завршно онлајн тестирање.
-Поентата на Понсети методот е пристапност. Може да се применува и во земји со ограничени ресурси, што го прави навистина револуционерен. Децата кои се лекувани по методот на Понсети имаат нормален живот, учествуваат во спортски активности и до крајот на животот немаат болка, за разлика од оперативно лекуваните пациенти, кај кои се појавува болка и неможност за правилно одење уште во раната адолесценција. Понсети методот може да се применува и кај поголеми деца кај кои не биле извршувани третмани, па така, мојот најстар пациент лекуван со овој метод имаше 12 години и лекувањето беше успешно – истакнува д-р Богојевска Доксевска.
Во јуни 2025 година, таа учествувала и како супервизор на Понсети мастер клас во Љубљана, каде што обучувала осум доктори од регионот. Таа денес не само што е експерт во третманот, туку и активно го шири знаењето низ Балканот.
