Во време кога сè повеќе внимаваме што внесуваме во организмот и се обидуваме да избираме поздрави и поприродни намирници, логично е да се постави прашањето: која е навистина најлошата опција што можеме да ја ставиме на трпезата наутро?
Одговорот за многумина е изненадувачки. Не станува збор за брза храна, мрсни оброци или алкохол, туку за појадок кој милиони луѓе, вклучително и деца, го консумираат секое утро со уверување дека му прават услуга на своето здравје.
Американскиот киропрактичар и здравствен едукатор д-р Ерик Берг во видео објава на TikTok објаснува зошто една од најчестите комбинации за појадок може сериозно да го оптовари телото. Како што вели, овој оброк е толку нормализиран што ретко кој се прашува дали навистина е здрав, и самиот го консумирал во детството, убеден дека е добар избор.
Станува збор за појадок составен од чинија житарки и чаша сок од портокал. Според д-р Берг, оваа комбинација претставува вистинска шеќерна експлозија и масовно преоптоварување со фруктоза уште на самиот почеток од денот. Иако на прв поглед делува побезбедно од потешки, мрсни опции, реалноста, според него, е сосема поинаква.
Голем дел од индустриски произведените житарки за појадок се високо преработени и содржат значителни количини додаден шеќер, рафинирани јаглехидрати, вештачки бои, ароми и масла од семки. Иако постојат интегрални и навистина поквалитетни варијанти, најпродаваните производи на пазарот често се блиску до слатки, но се продаваат под превезот на „здрав појадок“. Редовната консумација на ваква ултрапреработена храна, предупредуваат експертите, може да ја оптовари црниот дроб и да придонесе за развој на масна црнодробна болест.
Проблемот не завршува со житарките. Купечкиот сок од портокал, иако потекнува од овошје, нутритивно често е многу сличен на газираните пијалаци, особено поради високата концентрација на шеќер и отсуството на влакна. Според нутриционистите, луѓето често го перцепираат како здрав избор, а всушност внесуваат количина шеќер споредлива со таа во засладените пијалаци.
Сепак, важно е да се направи разлика. Свежо цеден сок, без додаден шеќер и конзерванси, во умерени количини може да има позитивен ефект – да помогне во намалување на воспаленија, да ја подобри дигестијата и да придонесе за превенција од бубрежни камења. Клучот, како и во многу други аспекти од исхраната, е во количината и контекстот.
Целта, нагласуваат експертите, не е целосно да се забрани омилената чинија житарки, туку да се развие свест за тоа што навистина внесуваме во телото, особено наутро, кога му даваме гориво за целиот ден. Појадокот има силно влијание врз енергијата, концентрацијата и метаболизмот, па информираниот избор е првиот чекор кон поздрави навики.
