Американскиот претседател Доналд Трамп изјави дека светот е поблиску од кога било до Блискиот Исток „ослободен од ирански терор и нуклеарна уцена“, тврдејќи дека Иран е значително ослабен по тековниот конфликт.
„Веќе 47 години Иран беше насилник на Блискиот Исток, но повеќе не е. Сега се во бегство“, изјави Трамп, пренесува Sky News.
Тој повтори дека американската војска е најмоќна во светот и оцени дека иранските сили се „десеткувани“, додавајќи дека Техеран би користел нуклеарно оружје доколку го развиел.
„Трампов теснец“ наместо Ормуски
Трамп повика Иран повторно да го отвори Ормуски теснец – клучна поморска рута за глобалната трговија со нафта.
Во еден момент, тој го нарече „Трампов теснец“, по што додаде дека тоа не било случајно:
„Мора да го отворат Трамповиот теснец… сакам да кажам, Ормускиот теснец. Лажните медиуми ќе кажат дека сум згрешил, но кај мене нема случајности“, изјави Трамп.
Тврдења за преговори и „подарок“ од Иран
Американскиот претседател наведе дека Вашингтон и Техеран водат преговори и дека постои можност за договор.
Тој тврдеше дека Иран испратил десет танкери со нафта како дел од тие разговори, што го опиша како „подарок“ и форма на извинување.
„Преговараат, и тоа го признаа два дена подоцна. За да ја поправат грешката, најавија дека ќе испратат уште осум бродови“, рече Трамп.
Критики кон НАТО и европските лидери
Трамп упати критики и кон НАТО, велејќи дека алијансата не помогнала доволно во конфликтот.
„Секогаш сум велел дека НАТО е хартиен тигар. Ако дојде до голема војна, гарантирам дека нема да бидат таму“, изјави тој.
Иако ги нарече пријатели, Трамп изрази незадоволство од ставовите на Емануел Макрон и Фридрих Мерц, кои се дистанцирале од конфликтот со Иран.
Остра реторика за иранското раководство
Трамп исто така изнесе тврдења за иранското раководство, велејќи дека врховниот лидер Моџтаба Хамнеи „повеќе не е врховен“ и дека Иран е земја во која „никој не сака да биде лидер“.
Овие изјави доаѓаат во момент на зголемени тензии и неизвесност околу можен дипломатски исход, додека војната и понатаму има сериозни последици врз регионот и глобалната економија.
