Американскиот претседател Доналд Трамп на инаугуративниот состанок на новоформираниот Одбор за мир објави дека девет земји-членки ветиле вкупно седум милијарди долари за пакет за обнова на Газа.
„Секој потрошен долар е инвестиција во стабилноста и надежта за воспоставување нова и хармонична област“, изјави Трамп, заблагодарувајќи им се на донаторите.
Иако сумата е значајна, таа претставува само дел од проценетите околу 70 милијарди долари потребни за целосна реконструкција на Газа, разурната по две години војна.
Фокус на реконструкција и безбедност
На состанокот во Вашингтон присуствуваа претставници на повеќе од 40 земји и Европската унија. Дел од државите учествуваат како полноправни членки на Одборот, додека други се приклучија како набљудувачи.
Меѓу присутните лидери беа индонезискиот претседател, аргентинскиот претседател и унгарскиот премиер.
Состанокот е насочен не само кон обнова на инфраструктурата, туку и кон создавање меѓународни стабилизациски и полициски сили што би ја одржувале безбедноста во Газа и би обезбедиле разоружување на милитантната група Хамас клучно барање на Израел во рамките на договорот за примирје.
Засега, само Индонезија официјално најави дека е подготвена да испрати свои војници како дел од тие сили.
Амбициозна визија и критики
Одборот за мир е дел од поширокиот мировен план на Трамп од 20 точки за завршување на конфликтот во Газа. Меѓутоа, по воспоставувањето на примирјето во октомври минатата година, претседателот ја прошири визијата за ова тело, со намера да се занимава и со други глобални конфликти.
Таквиот пристап предизвика загриженост кај дел од меѓународната заедница дека станува збор за обид да се создаде паралелна структура на Ujedinjene nacije.
Трамп изјави дека се надева оти Одборот ќе ги поттикне Обединетите нации „да го направат она што е потребно“, додавајќи дека ОН имаат „огромен потенцијал што не е целосно искористен“.
Белата куќа ги отфрли критиките, нагласувајќи дека станува збор за „легитимна организација со десетици земји-членки од целиот свет“.
Во меѓувреме, договорот за примирје во Газа останува кревок, а успехот на Одборот за мир ќе зависи од подготвеноста на сите страни да продолжат по патот на дипломатијата наместо нова ескалација.
