На светските финансиски пазари, вредноста на американскиот долар оваа недела бележи благо зголемување, и покрај тоа што Федералните резерви (американската централна банка) ги намалија каматните стапки и најавија дополнителни кратења.
Индексот на доларот, кој ја мери вредноста на американската валута во однос на кошничка од шест најважни светски валути, се зголеми за 0,05% и достигна ниво од 97,64 поени.
Притоа, доларот ослабе во однос на еврото за 0,1%, и се тргуваше по курс од 1,1745 долари за едно евро. Наспроти тоа, доларот зајакна во однос на јапонскиот јен, за 0,2%, достигнувајќи ниво од 147,95 јени.
Федералните резерви го намалија основниот каматен опсег
Во средата, по дводневната седница, раководството на ФЕД ги намали каматните стапки за 0,25 процентни поени, па сега основниот опсег изнесува од 4% до 4,25% – потег што беше очекуван на пазарите.
Претседателот на ФЕД, Џером Пауел, на прес-конференција објасни дека намалувањето е резултат на ослабен пазар на труд, но предупреди дека инфлацијата останува висока, со очекувања дека ќе продолжи да расте, особено поради новите царини.
Можни дополнителни намалувања до крајот на годината
Објавените нови проекции покажуваат дека тесно мнозинство од членовите на ФЕД предвидуваат уште две намалувања на каматите до крајот на годината.
Токму овие очекувања во средината на неделата го ставија доларот под притисок, па индексот привремено падна под 97 поени. Сепак, до крајот на неделата се случи опоравување, бидејќи пазарите проценија дека е поверојатен сценариото според кое ФЕД ќе направи само уште едно намалување, имајќи предвид дека инфлацијата може дополнително да се засили во наредните месеци.
Покрај Федералните резерви, и други централни банки во светот оваа недела ги намалија каматните стапки, во обид да го стимулираат економскиот раст. Меѓу нив се централните банки на Канада и Норвешка.
