Акциите на Tesla забележаа остар пад откако американското Министерство за правда минатата недела објави милиони документи од истрагата за починатиот сексуален престапник Џефри Епстин, меѓу кои и електронска преписка што го поврзува извршниот директор на Tesla, Илон Маск, со осрамотениот финансиски магнат. Објавите предизвикаа силна реакција на пазарите и нов бран критики кон Маск, пишува Futurism.
Контрадикции со претходните тврдења на Маск
Во објавената преписка, која датира од период по осудата на Епстин во 2008 година за сексуални злосторства врз малолетнички, Маск наводно прашувал дали има „добро време за посета“ на карипскиот остров на Епстин, како и за „планираните забави“. Ова е во директна спротивност со неговите јавни изјави од минатото, во кои тврдеше дека го одбил поканата да го посети островот.
Пазарите реагираа веднаш. Во понеделникот, акциите на Tesla паднаа за повеќе од 3,5 отсто, што аналитичарите го поврзуваат токму со сомнежите за искреноста на Маск и потенцијалниот репутациски ризик за компанијата.
Пад на вредноста и нестабилно закрепнување
Иако акциите подоцна делумно се стабилизираа, цената остана околу 426 долари, значително под нивото од околу 450 долари забележано претходната недела. Според пазарни коментатори, инвеститорите сè почесто реагираат на личните контроверзии поврзани со Маск, а не само на финансиските резултати на компанијата.
Се чини дека обвинувањата за лажење околу односот со Епстин претставуваат црвена линија дури и за дел од најлојалните поддржувачи на Маск, кои досега често ги игнорираа неговите јавни испади и контроверзни ставови.
Европа: подобри бројки, лош имиџ
Падот на акциите доаѓа и покрај знаците за закрепнување на продажбата на Tesla во Европа. Податоците за новите регистрации покажуваат раст на некои од клучните пазари. Во Шпанија и Италија, Tesla годинава регистрирала 70, односно 75 отсто повеќе возила во споредба со истиот период лани.
Овие бројки следуваат по исклучително тешка 2025 година за Tesla во Европа, кога пазарниот удел значително се намали. Дел од купувачите јавно изразија разочараност од политичките ставови и јавното однесување на Маск, кој во повеќе наврати беше обвинет за флертување со крајната десница и мешање во локалните политики на европските држави.
Парадоксот Tesla: продажба надолу, акции нагоре
Случајот уште еднаш го истакнува необичниот и често парадоксален однос меѓу реалните деловни резултати и берзанската вредност на Tesla. Иако продажбата минатата година опаѓаше, акциите во последните шест месеци пораснаа за речиси 38 отсто, а на годишно ниво за повеќе од 11 проценти – сè до најновиот пад.
Притисок од Кина и промени во стратегијата
Покрај скандалот со Епстин, Tesla се соочува и со растечки притисок од кинеската конкуренција. Financial Times објави дека Ford наводно водел разговори со Xiaomi и BYD за можна соработка, иако сите инволвирани компании подоцна ги демантираа тие информации.
Во меѓувреме, Маск најави значајни промени во производството. На последната презентација на деловните резултати откри дека моделите S и X ќе престанат да се произведуваат, а фабриката во Фремонт, Калифорнија, ќе биде пренаменета за производство на роботи.
Маск негира, ќерката потврдува
Маск ги отфрли објавените документи како „лажни вести“, тврдејќи дека е-поштата била „погрешно протолкувана“. Но, неговата ќерка Вивијан Вилсон, со која јавно нема добри односи, ја потврди автентичноста на документите.
Во објава на платформата Threads, таа напиша: „Во времето наведено во е-пораките бевме на Сент Бартс, и затоа верувам дека документите се автентични.“
