„Во моментот состојбата е повеќе од животозагрозувачка. Сакам да упатам апел и за смиреност и за вклучување во гаснењето на пожарот. Жал ми е што државна помош се уште не е пристигната и покрај нашите постојани инсистирања. Огнената стихија го зафаќа десниот брег на Крива Паланка и опасно се доближува до домовите,“ изјави Митовски.
Тој ги повика граѓаните да се вклучат во акцијата за гаснење, но и да се воздржат од непотребно движење по патиштата и да не ја трошат водата од бунарите за други цели освен за гаснење.
„Побаравме помош од Бугарија, како и од општините Кратово, Пробиштип, Куманово и Ранковце. Побарана е и интервенција од Армијата и хеликоптерската единица. Очекуваме сериозна поддршка во најкус можен рок,“ додаде тој.
Градоначалникот апелираше до граѓаните да не шират паника и страв, туку да останат смирени и да делуваат солидарно.
„Господ нека и е на помош на Крива Паланка,“ заврши тој во своето обраќање.
Пожарот засега останува неконтролиран, а локалните служби за итна интервенција, заедно со доброволци, се обидуваат да го стават под контрола. Ситуацијата се следи со зголемено внимание и се очекува вклучување на повеќе институции во наредните часови.
