„Длабоко во себе“ е Инклузивен креативен проект по повод Меѓународниот ден за подигање на свесноста за лицата со аутизам кој на 31 март ќе биде отворен во Галеријата Чифте Амам.
Ликовната уметност е важна за развојот на децата. Тие ги развиваат својата имагинација и способноста за креативно размислување, учат да комуницираат преку цртежи и бои и на невербален начин се искажуваат подобро и поубаво отколку што би можеле вербално за својата возраст. Тоа е особено потребно и корисно кај децата со попреченост во развојот и затоа важноста за постоење и анимирање на ваквите проекти е повеќе од потребно.
Па така, оваа година децата имаа можност да ја научат и да ја применат графичката техника монотипија. За разлика од другите графички техники, каде што може да се направат повеќе исти отпечатоци, кај монотипијата секој отпечаток е единствен.
Темата на овие работилници беше морски свет, па нанесувајќи на хартија графички бои, децатацртаа риби, морски ѕвезди, октоподи, морски желки, школки, како и различен морски свет. Со притисок, рачно или со преса, бојата ја пренесоа на хартијата. Резултатот што се добива со ваквиот начин на сликање е уникатна графика.
Во овие работилници учествуваа деца од повеќе училишта – ОУ „Невена Герогиева-Дуња“, ОУ „Св. Климент Охридски“, ОУ „Исмаил Ќемали“, ОУ „Имри Елези“, ДСУ зарехабилитација и образование „Свети Наум Охридски“, Здружението „Инклудиверса“, како и студентите од Педагошкиот факултет „Свети Климент Охридски“ под менторство на проф. д-р Бурхан Ахмети.
,,Изразуваме огромна благодарност до студентите и до професорот за нивната посветеност, за трпението и поддршката. Со нивна помош децата многу брзо ги совладаа основите на графиката и добија можност креативно да се изразат и да создадат свои уникатни дела.Навлегувајќи длабоко во морските длабочини, тие навлегоа длабоко во себе! Длабоко во својот свет, свет многу поискрен и поубав од оној што постои во реалноста” велат организаторите
!Маја Димитрова е едукатор на изложбата која ќе трае до 5 април.
